Ataatsimiititaliaq ikiorsiissutissanik nutaanik allanik akuersissuteqartoq

Naalakkersuisut ikiorsiissutissat marluk sapaatip-akunnerata siuliani saqqummiuppaat - 50-nit ikiorsiissutit aamma Ukiuunerani ikiorsiissutit. Ikiorsiissutissallu nutaat maanna suliarineqarlutik.

Inatsisartut Aningaasaqarnermut Akileraartarnermullu Ataatsimiititaliaata ikiorsiissutissat allat tallimanngornermi akuersissutigisimavai, suliffeqarfiit aningaasarsianut aningaasartuutiminnik matussutissatut qinnutigisinnaasaat. Ramanna allagaammi ataatsimiititaliap nittartagaatigut saqqummiunneqarsimasumi atuarneqarsinnaavoq.

Allagaammi atuarneqarsinnaavoq ikiorsiissutissat namminersortut suliffiutaanni sulisunut akissarsiaqartitsisunut Covid 19-imik eqqorneqartunut ikiorsiissutissat pineqartut.

Naalakkersuisut tassunga atatillugu qinnutigisimavaat, coronavirusi tunngavigalugu immikkut ittumik iliuutsinut konto 50 millioner koruuninik ilaqqinneqassasoq.

Naalakkersuisut apeqquteqarfigineqartut

Ataatsimiititaliarli ikiorsiissutissanik akuersissuteqarnermut atatillugu pingaarutilimmik apeqquteqaqqissimavoq.

Ataatsimiititaliap ilaatigut paaserusussimavaa, ikiorsiissutissat sooq aatsaat maannakkut saqqummiunneqarnersut:

- Ulloq 17. januar tusagassiortunik katersortitsinermi nalunaarutigineqartut inassuteqaatinut taakkununnga tunuliaqutaasut isummernissamut tunngavissiami allassimavoq, tamatumani innuttaasut tunillatsissimanermut ersiuteqartut angerlarsimaannarnissamik kaammattorneqarput. Inassuteqaatit matumani pineqartut sooq aatsaat 3. februar nassiuneqarpat?, ataatsimiititaliaq aperivoq.

Ataatsimiititaliamit aamma ikiorsiissutissat pillugu tusarniaanermi akissutigineqarsimasut paaserusunneqarsimapput, ataatsimiititaliallu ilanngullugu oqaatigaa, Naalakkersuisut 50 millioner koruunit nunatta karsiata missingersuutaanit sorlernit tiguneqarnissaannut innersuussisimanngitsut.

Ataatsimiititaliamit naatsorsuutigineqarpoq, ikiorsiissutissanik akuersissuteqarnikkut ukiumi angusassatut naatsorsuutigineqartut ajorseriassasut.