Ataatsimiititaliaq: Peqqinnissaqarfimmi suleqatigiinneq Joint Committeemut ilanngunneqarnissaa oqaluuserineqassaaq
Amerikamiut nakorsat peqqissaasullu Kalaallit Nunaanni sulisinnaanerannut aporfiit, Joint Committeemi oqaluuserineqassapput, ataatsimiititaliaq USA-mi angalareerluni taama nalunaaruteqarpoq.
Amerikamiut peqqinnissaqarfimmi sulisut nunatsinni peqqinnissaqarfimmi sulisussaqarniarnermik ajornartorsiuteqarnermut aaqqiissutissat ilagisinnaagaat, qaffasinnerpaamik oqaluuserineqartariaqarput.
Inatsisartut Nunanut Allanut Sillimaniarnermullu Ataatsimiititaliaa taama isumaqarpoq, ilaasortat piffissami 5. – 14. september 2023 USA-mut angalaqqammerput.
Peqqinnissaqarfimmi sulisut pillugit suleqatigiinnissaq oqallisigissallugu ataatsimiititaliaq periarfissaqarsimavortaaq, tamatumunnga atatillugu ataatsimiititaliaq Naalakkersuisunut saaffiginnissuteqarsimalluni peqqinnissamut tunngasut ataatsimut ataatsimiititaliaq Joint Committee pillugu isumaqatigiissummut ilanngunneqarnissaat kaammattuutigalugu.
Ataatsimiititaliami siulittaasuugallartoq, Pele Broberg (N), ataatsimiititaliamut ilaasortat isumaqatigiittut, Amerikamiut peqqinnissaqarfimmi sulisut nunatsinni sulisinnaanerannut aporfiusinnaasut oqaluuserineqarnissaat piumagaat, Sermitsiaq.AG-mut nassuiaavoq:
Annertuumik iluaqutaasinnaasoq
- USA-mit nakorsanik peqqissaasunillu periarfissavut annertusisinnaagutsigit annertuumik iluaqutaasinnaavoq. Nakorsanik peqqissaasunillu naammattunik assersuutigalugu Danmarkimit pissarsisinnaanngilagut.
- Peqqinnissaqarfik USA-mik suleqateqarnermut ilaanngilaq. Taamaammat ataatsimiititaliami Naalakkersuisunut allagaqarniarluta isumaqatigiippugut, Pele Broberg oqarpoq.
Allakkiami peqqinnissaqarfiup oqaluuserineqarnissaa ataatsimiititaliap piumasaraa:
- Assersuutigalugu nakorsap tikinnissaanut allaffissornikkut aporfeqarpat, taava aaqqinneqassaaq, Pele Broberg oqarpoq, Amerikamiut nakorsat akuerineqarnissaannut nunatsinni suliaqartoqaqqaassasoq oqaatigaa.
Namminiilivinneq illersornissaqarfillu oqaluuserineqartut
Ataatsimiititaliaq Naalakkersuisunit suli akissuteqarfigineqanngilaq. Nalunaarulli USA-p Danmarkimi aallartitaata ulluni makkunani Kujataaniinnerani takkuppoq, tassani Joint Committeemi ataatsimiittoqarpoq.
Peqqinnissaqarfiup saniatigut Washington D.C.-mi ilaatigut USAidimit, nunanut allanut naalakkersuisoqarfimmit State Departmentimit Pentagonimiillu atorfillit ataatsimeeqatigineqarput.
- Naalakkersuinermik suliallit eqqarsaatigalugit USA-mi inatsisartunut qullernut Senatimut ilaasortat Alaskamit Lisa Murkowski aamma Portlandimit Angus King ataatsimeeqatiginissaannut periarfissaqarsimavoq, taakkunanilu ilaatigut namminiilivinnissaq illersornissarlu kiisalu niuerneq peqqinnissarlu illugiilluni soqutigineqarlutik oqaloqatigiissutigineqarlutik, ataatsimiititaliaq nalunaarummi allappoq.