Ataatsimiititaliaq piumasaqarpoq: Erninermi sulinngiffeqarnermi kollegiartut iniminnit anisassanngillat
Ilumoorsinnaanngilaq ilinniartut erninermi sulinngiffeqarnerup nalaanni kollegiaminnit anisariaqartarnerat allamillu inissarsiorlutik. Inatsisartuni ataatsimiititaliaq taama isumaqarpoq, inatsisillu allanngortinneqarnissaanik ujartuilluni.
Inatsisartuni kulturimut, ilinniartitaanermut, ilisimatusarnermut ilageeqarnermullu ataatsimiititaliap inatsisartut kollegianut inatsisaat misissoqqissaaleruttorpaa.
Ilumoorsinnaanngilarmi ilinniartut erninermi sulinngiffeqartussanngortillutik kollegiaminnit anisariaqalersarnerat, allamillu inissarsiorlutik, uffa inoorlaamik isumaginnittussaasut. Ataatsimiititaliaq taama isumaqarpoq, Naalakkersuisunullu paasiniarlugu inatsimmik allannguinissamik suliaqartoqarnersoq.
- Inuusuttut amerlasuut ilinniagaqarnissaat tamatta isumaqatigaarput, ilinniartulli unitsitsiinnartartut eqqumaffigiuartillugit naapertuutinngilaq, erninermut atatillugu sulinngiffeqartarneq pillugu inatsit ilinniartut ilinniakkaminnik unitsitsiinnartarnissaannik ilinniartullu ineqarfimminniit anisariaqarnissaannik ingerlaannaq kinguneqartussanngorlugu aaqqissuussimagatsigu, ataatsimiititaliap siulittaasua Sofia Geisler tusagassiorfinnut nalunaaruteqarluni oqarpoq.
Ilinniartut peqatigiiffiat oqallissaarisoq
Ilisimatusarfimmi ilinniartut peqatigiiffiat, Pitaq, atuartartut allagaanni Inatsisartut kollegianut inatsisaat pillugu oqallissaarisimavoq. Inatsimmi §38 malillugu, ilinniartoq ilinniakkaminik unitsitsiinnarnermini kollegiamit anisussaavoq. Tamanna aamma atuuppoq ilinniartoq erninermini sulinngiffeqarallartussanngorpat.
Ilinniartut peqatigiiffiat isumaqarpoq inatsit naleqqussartariaqartoq, ilinniartoq angajoqqaanngornermini iniminit anisariaqartarnera allanngortinneqartariaqarmat. Ilinniartormi naammassinninnani unikkallartariaqalissaguni, kollegiassaarunneq pissutigalugu ilinniakkamik aallartitseqqinngitsoorsinnaasarmat.
Piumasaqaat ilinniartitaanermut ataatsimiititaliamit taperserneqarpoq:
- Meerartaaqqammersut meerartaamik isumagisussaanera pissutigalugu inissiamik nutaamik ujaasisariaqalertarnerat illersorneqarsinnaanngilluinnarpoq. Nutaanik ilinniartut ineqarfiinik sanaartortoqartariaqarpoq, taamaalilluni ilinniagaqarumasut tamarmik illoqarfimmut allamut ilinniagaqarfiusumut nuuttussat inissaqartinneqarsinnaaniassammata, Sofia Geisler oqarpoq.
Ataatsimiititaliap kultureqarnermut, ilinniartitaanermut, ilisimatusarnermut ilageeqarnermullu naalakkersuisoq, Peter Olsen saaffigaat kollegiat pillugit inatsimmik Naalakkersuisut allannguuteqarnissamik suliaqarnersut paasiniaaffigalugit.