Ataatsimiititaliarsuaq: Kalaallit Nunaat katataavoq
Nunanut allanut naleqqiullugu Kalaallit Nunaat arlalitsigut katataasimavoq. Tamanna Akileraartarnermut Atugarissaarnermullu ataatsimiititaliarsuarmit isummersuummi takuneqarsinnaavoq.
Isummersuut marlunngormat maajip 25-ani saqqummiunneqarpoq. Atuarneqarsinnaavorlu Inatsisartuni naalakkersuinermi suliallit aningaasaqarnermut politikki eqqarsaatigalugu assortuuttut arlallit isummerfigisariaqarpaat:
* Utoqqaat amerliartorput - taamaalilluni peqqinnissaqarnermut utoqqarnillu isumaginninnermut aningaasartuuteqarnerulissaagut.
* Peqqinnissaqarnermut aningaasartuutit amerliartorput, ilaatigut amerlanerujartortut sukkortalernerisigut allatigullu inooriaatsimik tunngaveqartumik nappaateqartalernerisigut.
* Kalaallit Nunaat aningaasaqarnikkut katataajartorput. 1990-illi kingorna nunatsinni aningaasaqarnikkut ukiumut procentimik ataatsimik qaffariartoqartarpoq, tassalu nunanit OECD-miittunit amerlanernit affaannaalluni.
* Nunarpassuarnut allanut naleqqiullugu Kalaallit Nunaat annertunerujussuarmik pisortaqarfeqarpoq. Inuit suliffillit 60 procentii sinnerlugit toqqaannertumik toqqaannanngitsumillu pisortani suliffeqarput.
* Ullumikkut inuppassuit aalajangersimasumik suliffeqanngillat. Inuppassuillu piginnaalersitsisumik ilinniagaqarsimasuunngillat.
Taamaattumik suut akissaqartinnerivut eqqartorneqartariaqarpoq - qanorlu ililluta inuiaqatigiinnut atugarissaartunut amerlanerusunik isertitaqarsinnaalersinnaanersugut, ataatsimiititaliarsuaq erseqqissaavoq.
Isumaginninnikkut kingornuttagaq
Isummersuummi aamma tikkuarneqarpoq, isumaginninnikkut kingornuttakkap - inuppassuimmi atugarliorlutik peroriartortarput - allanngortinnissaanut peqqutissarpassuaqartoq, qulakkeerneqarlunilu meeqqat pitsaasumik inuunertik aallartitsinissaat.
- Meerarpassuit inuusuttullu inuunertik aallartinnerliorunikku tamanna inersimalernerannut sunniuteqartarpoq. Nammineq pilersulernissaq ajornarsiartussaaq, inuiaqatigiillu atugarissaartut aaqqitassaqarnerulissapput. Aamma utoqqarnik isumaginninnissamut periarfissat tatineqassapput, oqallissaarummi atuarneqarsinnaavoq.
Ilinniartitaaneq akisooq
Ataatsimiititaliarsuarmit aamma tikkuarneqarpoq, ilinniartitaanermut aamma aningaasarpassuit atorneqartartut, aningaasaliinerulli annertussusaanut naleqqiullugu pitsaassuseq naammannani.
Meeqqat atuarfiani ilinniartitsisoq ataaseq agguaqatigiissillugu meeqqanik aqqanilinnik atuartitaqartarpoq - Kalaallimmi Nunaanni sumi tamani atuarfeerarpassuaqarpoq. Taamaakkaluartoq atuarfiup pitsaassusaa naammanngilaq.
Aamma ataatsimiititaliarsuarmit apeqqutit allat eqqartorneqarput, pitsaanerunnginnersoq IT ungasianiillu atuartitsinerit atorlugit meeqqat atuartinneqartassannginnersut, ullumikkorniit pitsaanerusumik ilinniartinneqalerlutik - aningaasat ikinnerit atorlugit?
Aallararneq
Ataatsimiititaliarsuarmit apeqqutit pingaarutillit allat aamma eqqartorneqarput: Kalaallit Nunaanniit aallararneq qanoq unitsinneqarsinnaava?
Ukiumut inuit 1.100 missaat Kalaallit Nunaanni inunngorsimasut aallartarput, inuillu 750-it maanga nuuttarlutik. Siunissami inuiaqatigiinnut atugarissaartunut tamanna ajornartorsiutaassaaq annertooq, ingammik kalaallit inuusuttut ilinniarluarsimasut pineqartillugit.