Tuapannguani ajutoorneq
Ataatsimik ukiullip ataataata suliaq politiinut suliassanngortippaa
Nukappiarannguaq ataatsimik ukiulik tallimanngormat Nuummi Tuapannguani inissiarsuarmi quleriit arfernanniit nakkartoq tupinnaannartumik annappoq. Angajoqqaajusut maanna piumasaraat akisussaaffimmik inissiisoqassasoq
- Ullumi politiiniippunga suliarlu politiinut suliassanngortillugu. Tupinnaqaaq inissiat iserterfigineqarnissaat akuerineqarsimammat inissiarsuarmi malittarisassat uniorlugit sananeqarsimasumi, nukappiaqqap ataatsimik ukiullip ataataa Elias Inûsugtok Sermitsiaq.AG-mut oqarpoq.
Atuaruk: Naalungiarsuk 6. sal-imiit nakkartoq
Taama iliorpoq ajutoornikkut ernera Tuapannguani inissiarsuiarni portusuuni quleriit arfernanniit tallimanngormat unnukkut nakkaareersoq maannalu Dronning Ingridep napparsimmavissuani sinitsinneqarluni.
Aneerasaartarfik ulorianartoq
Nukappiaraq ataatsimik ukiulik pisunnialeqqaajuvoq. Taanna inissiap iigaata aneerasaartarfiullu ungaluugaani napasup siulliup akornatigut quleriit arfernanniit nakkarpoq tallimanngornermi unnukkut arnaa errortanik manisinialersoq.
- Iikkamiit aneerasaartarfiup napasuanut siullermut 17 centimeterinik ikertutigaaq. Tassuuna meeqqat nakkariaannaapput tassalu erninnguarput taama pivoq, Elias Inûsugtok oqarpoq.
Sanaartornermut malittarisassani kapitalit sisamaanni immikkoortut aappaanni allaqqavoq:
”Ungaluukkat tamarmik sananeqassapput illup atorneqarnissaanut naleqqussumik inuit sapinngisamik pitsaanerpaamik toqqissisimasinnaatinniarlugit.
Tuapannguani inissiarsuit malittarisassanik tamakkuninnga malinninngitsut Elias Inûsugtok isumaqarpoq maannalu piumasaralugu akisussaaffimmi inissiisoqarnissaa.
Ajutoorneq pillugu ataataasup oqaluttuaa qanittumi aamma atuarneqarsinnaalissaaq.