Ataatsimoortumik tapiissutissat isumaqatigiissutigineqartut: Ikiorsiissutissat nutaat atuutsinneqalernissaat ukiup affaanik kinguartinneqarpoq
Naalakkersuisut aappaagu kommuninut ataatsimoortumik tapiissutisat isumaqatigiissutigisimavaat. Kommunit isumaqatigiissuteqarfigineranni, pisortanit ikiorsiissutit aamma 'suliffissarsiornermi ikiorsiissutit' nutaarluinnaasut pillugit malittarisassat nutaat kinguartinneqarsimapput, aatsaallu ulloq 1. juli 2023 atuutsinneqalissallutik. Tamatumunnga pissutaavoq, kommunit it-kkut atortorissaarutaasa malittarisassanik nutaanik suli isumaginnissinnaannginnerat.
Naalakkersuisut nunamilu borgmesterit tallimaasut aappaagu ataatsimoortumik tapiissutissat sapaatip-akunnerani matumani isumaqatigiissutigisimavaat.
Tapiissutissat 1,65 milliarder koruuniussasut aalajangerneqarsimavoq, aningaasaqarnermullu naalakkersuisup Naaja H. Nathanielsenip (IA) isumaqatiginninniarnermik ingerlatsisimaneq naammagisimaarpaa:
- Ataatsimoortumik tapiissutinut isumaqatigiissut imaaliallaannaq takkunneq ajorpoq, tamannali kommunit aamma Naalakkersuisut akornanni isumaqatigiinniarnikkut ammasumillu oqaloqatigiinnikkut inernerulluni, naalakkersuisoq tusagassiorfitsigut nalunaaruteqarnemi oqarpoq.
Naalakkersuisup ilanngullugu oqaluttuaraa, kommunit isumaqatiginninniarnermi pisortanit ikiorsiissutinik aamma suliffissarsiornermi ikiorsiissutinik atuutsitsilernissamik kinguartitsinissaq qitiutissimagaat.
Naapeqatigiissinnaaneq nuannaarutigigaa
Inatsisissaq nutaaq upernaakkut ataatsimiinnermi akuerineqarpoq 2023-milu januaarip aallaqqaataani atuutilertussaagaluarluni. Kommunilli pineqaartunik aqutsinissamut piareersimanngillat.
- Naalakkersuisut inatsisit taakku 1. juli 2023-mi atuutilersinneqarnissanut kinguartitsinermik inatsisissamik siunnersuusiornissaannut isumaqatigiissuteqarnerput nuannaarutigaara. Inatsisissatut siunnersuut maanna ataatsimiinnermi Inatsisartunit suliarineqassaaq, Naaja H. Nathanielsen oqarpoq.
Ukiakkut ataatsimiinnermi oqaluuserisassani takuneqarsinnaavoq, inatsisissatut siunnersuut nutaanik malittarisassartalik sisamanngornermi suliarineqapallanneqartussatut ilanngunneqarsimasoq. Siunnersuut siullermeerlugu, aappassaaneerlugu pingajussaaneerlugulu ullormi pineqartumik suliarineqassaaq.
Isumaqatigiissut immikkuualuttunik isumaqatigiissutitaqarpoq. Ilaatigut allassimavoq, Naalakkersuisunit naatsorsuutigineqartoq, kommunit danskit KommuneKrediat aqqutigalugu siunissami aningaasanik taarsigassarsisinnaalernissaat pillugu 2022-p naanerani isumaqatigiissuteqarnissaq. Tamanna aqqutigalugu nunatsinni kommunit iluaqutissaminnik taarsigassarsisinnaanngussapput.
- Kommunit ilaatigut taarsigassarsiassanut ataasiakkaanut kissaatigisaminni pisariaqartinneqartumik erseqqissaaqataanissaat, ilaatigullu ukiuni 5-10-ni tulliuttuni Kommunekredit aqqutigalugu kommunit ataasiakkaat taarsigassarsiassatut pisariaqartitaminnik piviusorsiortumik missingiisinnaanissaat naatsorsuutigineqarpoq, isumaqatigiissummi allassimavoq.