Atassummi kalattoorneq
Nuummi Katersortarfimmut partiimik tapersersuisut 50-it missaanniittut qinersinerup unnukkuani ornigussimapput.
Inuit 50-it missaanniittut nuannisarput Nuummi Atassut qinersinermi unnussiortitsinerani. Kalattoortoqarpoq iikkamilu isiginnaarut angisooq qimerloorneqartarluni.
– Unnuk aallartipparput nereqatigiinnermik, nuannisaqaagullu KNR-ip inernernik saqqummiussinissaata tungaanut, Atassutip allattaa, Jensine Berthelsen, siuariarnissamik naatsorsuuteqartoq sinerissami tapersersuisut aamma qinigassanngortittut qineqqusaarnermi partiimik tapersersuinerminnik takutitsisimanerat pissutigalugu.
Finn Karlsenili allatsiminit mianersornerulaarpoq.
– Nalunartorujussuuvoq qinersinerup inerneranik eqqoriaanissaq. Kisianni neriuutigigaluarpara kinguariannginnissarput. Naak kikkut tamarmik kinguariarnissatsinnik siulittuigaluartut, Atassutip siulittaasua Finn Karlsen oqarpoq.
Sermitsiap angalaartitaata siullermik qinigassanngortittoq inuusuttoq, Naasuannguaq Olesen, saaffigaa. Qinersinerup inernerata paasinissaanut piareersimanerarpoq, qinigaagaluaruniluunniit aamma qinigaanngikkaluaruniluunniit.
– Pissangavunga qinigassanngortittutut allatulli. Imaassinnaavoq qinigaanngitsunga, soorlu allat siullermik qinigassanngortittutulli, kisianni soorunalimi neriuutigaara qinigaanissara, aappaatigulli aamma piareersimaffigalugu qinigaannginissara, 20-nik ukiulik Naasunnguaq Olesen nuna tamakkerlugu qinersinermi inernerup saqqummiutinnginnerani taama oqarpoq.