Atassummit qinigassanngortittup Air Greenlandip pisiarineqarnissaanut siunnersuummut akerliuvoq
Inuit Ataqatigiit timmisartortitseqatigiiffimmik tamakkiisumik piginnittunngornissamut siunnersuutaanut Qulutannguaq Berthelsen Atassummeersoq isumaqataanngilluinnarpoq
- Nunatsinni unammilleqatigiinneq annertusartariaqarparput namminersortullu amerlanerusariaqarput, aatsaat taamaaliorutta unammilleqatigiinneq atuutilissaaq, pisortat suliffeqarfiutaat nunatsinni unammilleqatigiinnissamut ineriartornissamullu killilersuivallaaleqaat.
Atassummi siulittaasup tullia Qulutannguaq Berthelsen, Inatsisartunut qinersinissamut aamma sassartoq taama oqarpoq. Air Greenlandimut piginneqataassutsit sinneri 62,5 procentit SAS-imit aamma danskit naalagaaffiannit pisiarinissaannut Inuit Ataqatigiit siunnersuutaat taassuma isornartorsiorpaa.
Atuaruk: Ole Dorph: Air Greenlandip pisiarinissaanut eqqarsaatit unitsillik
- Silaannakkut angallannermi billetsit akii nunatsinni qaffasippallaarujussuarput, tassani pissutaavoq piginneqatigiiffiup unammillerteqannginnera. Nunatsinni silaannakkut angallannermi unammilleqatigiinneq ingerlanneqalerpat billetsit akii appasissut takussaanerulissapput, taanna erseqqissaavoq.
Ingerlatseqatigiiffinnik Namminersorlutik Oqartussanit pigineqartunik namminersortunngorsaasoqartariaqartoq, Qulutannguaq Berthelsen isumaqarpoq.
- Pisortat suliffeqarfiutaat allat aamma namminersortunngorsarneqarsinnaapput soorlu Tele-Post, namminersortunngorsaagutta unammilleqatigiinneq pitsaasoq anguneqarsinnaavoq. Air Greenland aamma Tele-Post suliffeqarfittut sinneqartoorfiulluartarput atuisuminnullu akigititaat qaffasissorujussuullutik, unammilleqatigiinnerlu eqqunneqarpat atuisunut akit apparnissaat anguneqarsinnaavoq, Qulutannguaq Berthelsen oqarpoq.