Atassummiup ilaasortat qimarrannerat ernummatigaa
Inatsisartuni ilaasortap Emilie Olsenip Atassutip qullersai ilaasortat arlallit partiinut allanut nussornerat pimoorullugu tigoqqullugu kajumissaarpai.
– Pisut toqqissisimassutiginngilakka, Emilie Olsen marlunngormat Qanorooq-mi oqarpoq.
Taassuma Atassutip ilaasortani arlallit partiinut allanut annaammagit uparuarpaa. Kingullermik partiimi ukiorpassuarni ilaasortaasimasoq Hans Pavia Egede partiimik tunussilluni Inuit Ataqatigiinni ilaasortanngorpoq.
Taanna sioqqullugu folketingimut inatsisartunullu ilaasortaq Otto Steenholdt politikkikkut kingullermik suliaqarnermi nalaani Siumumut nuuppoq. Partiimut tassunga ukiuni kingullerni ilaasortanngortut tassapput Atassutip Peqqissutsimut naalakkersuisunut ilaasortaatitarisimasaa Edward Geisler, Kangaatsiap borgmesteria inatsisartunullu ilaasortaq Otto Jeremiassen aamma inatsisartunut ilaasortaq Itillimeersoq Isak Davidsen. Illuatungaatigut Gert ignatiussen Ammassaliup kommuneaneersoq Atassummut ilaasortanngorpoq.
Emilie Olsenip Atassutip partiimi qullersaaniit eqeersimaarnerulluni iliuuseqartoqarnissaa ujartorpaa.
– Isumaqarpunga ulluinnarnni aqutsisut siulersuisuunerillu tusarsaanerusariaqartut aammalu inuit piginnaatitaaffigiinnaraannik oqaannarani ilaasortat suna pillugu partiinut allanut nuuttarnerat misissuiffigisariaqaraat. Ilaasortaajunnaartartut amerlavallaaqaat, Emilie Olsen Qanorooq-mi oqarpoq.
Aallakaatitami oqaatigaa 2008-mi apriilip 8-ni kommunerujussuanngortussanut qinersinissanut qinigassanngortinnissaminik pilersaaruteqarnani. Ullumikkut Atassut kommuninit 18-iusunit pingasuni borgmesteriutitaqarpoq. Ittoqqortoormiini (Erling Madsen), Upernavimmi (jens Immanuelsen) aamma Qeqertarsuarmi (Augusta Salling).