Atassut: Akileraartarnermik aaqqissuusseqqinnissamut isumaqatiginninniarnerit unittooqqapput
– Isumaqatiginninniarnerit suli naammassinngillat.Novembarimili Naalakkersuisunit tusagaqaqqinngilagut,Atassummi politikkikkut siulittaasup tullia, BentiaraqOttosen oqarpoq.
OBS: Aningaasaqarnermut akileraartarnermullu naalakkersuisup, Erik Jensenip Atassummut akissutaa allaaserisami siullermik ilaatinneqanngikkaluarpoq. Naalakkersuisup akissutaa maanna ilanngunneqarpoq.
Atassutip politikkikkut siulittaasuata tulliata Bentiaraq Ottosenip akileraartarnermut aaqqissuusseqqinnermut isumaqatigiinniarnerit pillugit 2023-mi novembarimili Naalakkersuisut tusagaqarfigisimanngilai. Aningaasaqarnermut akileraartarnermullu naalakkersuisup Erik Jensenip (S) naatsorsuutigigaluarpaa akileraartarnermut aaqqissuusseqqinneq pillugu isumaqatigiinniarnerit 2023-p naannginnerani naammassineqarumaartut.
Taamak allaaserinnippoq aviisi Sermitsiaq.
– Isumaqatiginninniarnerit suli naammassisimanngillat, novembarimili Naalakkersuisunit tusagaqarsimanngilagut, Atassummi politikkikkut siulittaasup tullia Bentiaraq Ottosen oqarpoq nassuiarlugulu Naalakkersuisut 2024-mut aningaasanut inatsit pillugu isumaqatiginninniarnermi akileraarutit aaqqissuuteqqinneqarnissaat pillugu siunnersuuteqartut.
– Naalakkersuisut 2024-mut aningaasanut inatsisissaq pillugu isumaqatiginninniarnernut atatillugu akileraarutitigut aaqqissuusseqqinnissamut siunnersuut sisamanik immikkoortortaqartoq saqqummiuppaat, imarisaa itisiliiffiginagu. Atassummiit piumasarinikuuarput siunnersuut misissoqqissaarneqassasoq tapersersornerlugu isummerfigitinnagu. Novembarimiilli Naalakkersuisut oqaaseqarsimanngillat isumaqatiginninniarnissanulluunniit qaaqqusinngillat, Bentiaraq Ottosen oqarpoq, taassumali isumaqatiginninniarnissanut suli ammalluni oqaatigaa.
Naalakkersuisoq: Isumaqatiginninniarnerit ingerlapput
Aningaasaqarnermut akileraartarnermullu naalakkersuisup, Erik Jensenip (S) oqaatigaa akileraartarnermut tunngatillugu isumaqatiginninniarnerit uninnganngitsut. Illuatungaanili oqaatigalugu isumaqatiginninniarnermi inaarutaasumik ataatsimiinnissat sapaatip akunnerata tulliani pisussatut naatsorsuutigineqartut:
- Akileraartarnermik aaqqissuussinerup inaarutaasumik imarisai pillugit partiinut Inatsisartuniittunut arlaqartunut oqaloqatiginninnerit suli ingerlappagut. Isumaqatiginninniarnerit annertuumik soqutigineqarput, aaqqiissutissallu assigiinngitsut ammaffigineqarlutik. Tamanna tunngavigalugu isumaqarpunga tamanut saqqummiunneqartussamik inerniliingajalissajunnarsisugut, Erik Jensen ilisimatitsivoq.
Allaaserisaq tamaat aviisimi Sermitsiami atuaruk.
