uran pillugu oqallinneq
Atassut: IA uranimut allamik isumaqalerami?
Aatsitassat uranitallit maajip aallaqqaataani IAp oqaaseqarfigimmagit Atassut paatsuugalerpoq
Atassutip Inuit Ataqatigiit pasillerpai eqqunngitsunik tunngavilersornikkut pissaaneqarnerulerniarnerarlugit. Taama pisoqarpoq Inuit Ataqatigiinni siulittaasuugallartoq Aqqaluaq B. Egede oqaaseqareersoq aatsitassat uranitallit qallorneqarnissaat IAp ammaffigigaa innuttaasut peqqissusaat innarlernagu tamanna pisinnaappat.
Maajip aallaqqaataasiornermi oqalugiaasit suliffissaaleqinerup maanna Nunatsinni innuttaasunik 4.000-it sinneqartunik eqquisup akiorniarnissaanut tunngatinneqarput. SIKp siulittaasuata Jess G. Berthelsenip aatsitassat uranitallit qallorneqarsinnaanerat illersorini tamanna innuttaasut peqqissusaannik innarliinngitsumik pisinnaappat.
Nalunaarut tamanna Aqqaluaq B. Egedep taperserpaa taanna oqaaseqarmat uranitalinnik aatsitassarsiornissaq ammaffigalugu.
Isertortumik anguniagaqarneq?
Tamanna Atassutikkut paatsuugassutigaat innersuussutigaalu uranimut naaggaarluinnarsimanerup atorunnaarsinnissaa pillugu oqallinneq tassani Inuit Ataqatigiit akerliulluinnarmata.
- Innuttaasunik ataatsimiisitsinerni, allaallu Inatsisartut oqaluttarfiat aqqutigalugu arlaleriarlusi erseqqissaatigisarparsi ilissi pissaanermik tiguseqqikkussi akuersaanngilluinnarnermik atorunnaarsitsisimaneq atorunnaarsinniarlusiuk, taamaammat Atassummit naatsorsuutigaarput paatsuunganerput paasisinnaagissi, aammalu naatsorsuutigaarput isummassi allanngorsimanera inuiaqatigiinnut naqissuserlugu uppernarsassagissi, Atassutip siulittaasua Gerhardt Petersen Inuit Ataqatigiinnut ammassunik taama ilaatigut allappoq.
Taassuma qujamasuutigaa uranimut politikki pillugu innuttaasut ataatsimoornerulissammata akerleriinni angeqqatigiingajanni marlunni inissisimareerlutik. Atassutilli pasitsaassimavaa Atassut isertortumik anguniagaqartoq.
- Isumaqarsimagussili inuiaqatigiit aaqqissuussaanerannut ilusilersuinermut pissaanermik annertunerusumik pissarseriarlusi tamatumalu kingorna iluaniit aalajangersimaneq allanngortinniassallusiuk periarfissarsissallusi eqqarsaatigilaartariaqarparsi pissaaneq piinnarlugu innuttaasut tatiginninnerat aalaakkaasumillu inuiaqatigiit ingerlanneqarnissaannik piumasaqarnerat sakkortuumik innarlersinnaagassiuk, taamaammat ATASSUT-mit sakkortuumik kaammattussavassi pineqartoq pillugu erseqqissumik unneqqarissumillu naalakkersuinikkut isummassinnik mumisitsisimanersi tusarteqqullugu, Gerhardt Petersen oqarpoq.