Atassut inatsimmut ajorineqaqisumut akuerseqataavoq
Højskolerniarluni tapiissutit peernerannut partii nipituuliorluni isornartorsiuivoq. Aningaasaqarnermulli ataatsimiititaliami Atassutip ilaasortaatitaata siunnersuut akuerseqataaffigaa.
Danmarkimi højskolerniarluni inunnut 50-inut tapiissutit aningaasanik inatsimmiit peerneqarsimanerat paasineqarmat Atassutip siulittaasuata Naalakkersuisut sakkortuumik isornartorsiorpai.
ALLAASERISAQ ATUARUK: Højskolerniartunut tapeeqqittalernissaq Atassutip piumasaraa
Partii illuatungiliuttoq siunnersuummut akuerseqataavoq, aningaasanut inatsisissap taasissutigineqarnissaa sioqqulugu aningaasaqarnermut ataatsimiititaliami oqaluserineqarmat, marlunngormat unnukkut radioaviisimi KNR oqaluttuarpoq.
Allannguutissatut siunnersuut normu 20 (højskolerniartutut tapiissut, aaqq.) aningaasaqarnermut ataatsimiititaliami oqaluuserineqarpoq 2010-mut aningaasanut inatsisissap aappassaanerlugu oqaluuserineqarnerani. Tassanilu ataatsimiititaliami Atassutip ilaasortaatitaa, Finn Karlsen, allannguutissamut akuersaarluni taaseqataavoq.
'Aningaasaqarnermut ataatsimiititaliaq isumaqatigiilluni innersuussivoq, allannguutissatut siunnersuut normu 1 - 53 (...) akuersaarneqassasoq*, taama aappassaaneerilluni oqaluuserinniinermut tunngatillugu isumaliutersuummi allassimavoq.
Novembarip 6-ani taasereernerup kingorna højskolerniarluni tapiiffigineqarnissamik periarfissaq aningaasanut inatsisissatut siunnersuummiit peerneqarpoq.
Atassutip siulittaasuata Gerhardt Petersenip taama ersaritsigisumik imminut assortuunneq nassuiaruminaatsippaa.
Paasissutissat saqqummiunneqareersut Gerhardt Petersen KNR-imut oqarpoq:
- Naagga, oqareernertuut aningaasanut inatsisissatut siunnersuut tamakkiisoq akuersaarnatigu taasivugut.
Partiimi siulittaasoq isumaqarpoq paatsuuisoqarsimassasoq, naak ersarissumik takuneqarsinnaagaluartoq, Atassut højskolernissanut 50-inut tapiissutinut tunngatillugu allannguutissamik siunnersuut akuersaarlugu taaseqataasoq.
- Naagga, paasinerluisoqarsimassaaq. Aningaasanut inatsisissatut siunnersuut tamakkiisoq akerleralugu taasivugut, partiimi siulittaasoq KNR-imut oqarpoq.
Atassutip aningaasanut inatsisissaq tamakkiisoq akuersaarnagu taasivoq. Allannguutissamulli siunnersuut pineqartoq taasissutigineqartussanngormat, tassani højskolerniarluni tapiiffigineqarsinnaanermut periarfissap aningaasanut inatsimmik isumaqatigiinniarnermiit peernissaa Atassutip akuerseqataaffigimmagu.
ALLAASERISAQ ATUARUK: Danmarkimi højskolernermut tapiissutit peerneqarput