Atassut: Inissiisarfik matoqqasoq allamut nuutissiuk
Inissiisarfiup pilersinneqarnerani tarnip nakorsai malinnaassapput, taakkulu illoqarfimmut iluaqutaassapput. Taamaattumik Nuummiittariaqanngilaq, Steen Lynge erseqqissaavoq.
Matoqqasumik inissiisarfiliornissaq piffissami aalajangigaanngitsumi unitsinneqarallarpoq. Taamaattoqarneranut peqqutaavoq Nuummi sanaartornissaanut piareersaasiornerup ilimagisamiit akisunerunissaa. Maannakkut Naalakkersuisut, Pinerluttunik Isumaginnittut Danmarkimilu inatsisinik atortitsinermut ministeri Lars Barfoed qanorpiaq akeqarnissaanik qulaajaapput.
Steen Lynge Atassummi naalakkersuinikkut siulittaasup tullia isumaqarpoq, eqqarsaqqittoqarnera atorluarlugu Nuummi mittarfiup eqqaaniit allaanerusumik inissinnissaa eqqarsaatigineqartariaqartoq.
Maluginiarpaa Nuummi inissinnissaanut ilaatigut tunngavilersuutit ilagigaat tarnip nakorsaqareernera. Taamatulli tunngavilersuineq atorsinnaanngilaq, Steen Lynge oqarpoq.
- Nuummi innuttaasunut nalinginnaasunuttarnip nakorsaannik katsorsartinnissaannut tarnip nakorsai ikippallaareerput. Meeqqat tarnip nakorsaanik oqaloqateqarnissamut innersuunneqartut ukioq ataaseq angullugu utaqqisariaqartarput, Steen Lynge oqarpoq.
Nuummi matoqqasumik inissiisarfiliornermi amerlanerusunik tarnip nakorsaqartussaanngilaq, aammali nunap sinnerani amigaateqarnerujussuarmut iluaqutaassasani.
- Inissiisarfiup illoqarfinni allami inissinnissaa nunatsinnut tamarmut iluaqutaassaaq, taamatut inissinneqarnerata kingunerissammagu allat aamma iluaqusersorneqarnerat nutaanik tarnip nakorsaqalernikkut, Steen Lynge oqarpoq.
Nuup avataaniinnissaanut sumiikkuni iluaqutaanerussanersoq oqaatigerusunngilaa.
- Illoqarfiit allat suliffissanik ataavartunik peqalissapput aningaasaqarnikkullu iluaquserneqarlutik, matoqqasumillu inissiisarfeqalerneratigut suliffissat allat pilersinneqassapput, illoqarfimmullu aningaasaqarnikkut iluaqutaalluni, Steen Lynge isumaqarpoq.