Atassut: Innuttaasut immiaaraliorsinnaanngortillugillu viinniliorsinnaanngortinneqarlik
- Piffissanngorpoq eqqarsartariaaseq naatsorsuutiginninnerlu politikerit pisortallu akisussaaffik tamaat tigummigaannimik eqqarsartariaatsip qimannissaa, ilaatigut partiip tunngavilersuutigivaa inuit namminneq immiorusukkunik immiorsinnaanissaat. Naalakkersuisut mianersoqqusipput, siunnersuut taamaattoq aaqutigalugu inuit imigassartornerulernissaannik kinguneqaannassanerarlugu.
Erseqqissaat: Atassutip erseqqissaatigaa siunnersuummi "immiaq" pineqanngitsoq, pineqartulli tassaasut immiaaqqat viinnillu.
Namminiilivinnissamut aqqut sunaassanersoq politikerit assortuussitigisaannarpaat, Atassutilli aaqqiiisuutaasinnaasutut isigisamik ilaat matumani nassaarisimarpasippaat nunarput nammineernerulersinneqassappat.
Partiimmi kissaatigivaa innuttaasut namminneq kiffaanngissuseqarlutik aalajangersinnaassasut, angerlarsimaffimminni immiorusunnerlutik. Siunnersuut sisamanngornermi Inatsisartuni oqaluuserineqartussaavoq:
- Apeqquteqaat aallaavigalugu toqqaannartumik nammineq immiorsinnaanermut kiisalu immiassanik eqqussisinnaanissamut tunngasoq assersuutigivarput. Uanimi oqallinnermi partiit politikkerillu ataasiakkaat innuttaasunik nunaqqatitsinnik qanoq tatiginninneq isikkoqarnersoq ersarissarsinnaagatsigu.
- Uagummi Atassummiit inuiaqatigiit nammineersinnaasut imminnullu paarilluartut tatigivagut. Tatiginninnerlu nammineerneruleriartornissamut aqqutissaasorivarput.
Akussat eqqortut innuttaasut pisiarisinnaasariaqarpaat
Sermitsiaq.AG-mit Atassutip siulittaasua, Aqqalu Clasen Jeremiassen, aperaarput qanoq ilillutik aamma sooq isumaqarnersut angerlarsimaffimmi immiortarneq kiffaanngissuseqarnermut namminiilivinnissamillu sulissutiginninnermut attuumassuteqartinneqarsinnaanersut.
- Innuttaasut kiffaanngissuseqarlutik inuunerminnik namminneq aqutsisinnaatitaanissaat uagutsinnut pingaaruteqartorujussuuvoq. Matumani immiortarneq assersuutitut atuinnarparput, siunertaraarpullu apeqquteqaatitsinnut partiit allat qanoq isummersornersut tusarnissaat, tassami suunngitsuusaaraluartorluunniit isitsinni pingaarutilinnik apeqqutinik oqaluusererusutaqarpugut, sukangasoorujussuarmik killilersuinerup nassatarisartagai eqqarsaatigalugit:
- Siullermik pinerluttunngortitsisoqartarpoq immiornissamut akuutissat eqqortut humlit maltillu nunatsinnut angerlaateriaraluaraanni. Immiornissamut akuutissat eqqortut amigaataanerisa kingunerisaanik inoqateqarpugut immiortartunik peqqissutsimut qularnartumik akulinnik, taamaalillutillu imminnut peqqissutsikkut navianartorsiortilersartunik, Jeremiassen siunnersuutip tunuliaqutaa pillugu nassuiaavoq.
- Ulluinnarnimi nioqqutissat atorlugit immiorniartoqartillugu iluamik suliarineqarsimanngippat ulorianartunngorsinnaasarpoq allaallu tappingissutaasinnaasarluni. Immiassanillu pisisoqarsinnaalerpat iluameernerusumik ulorianannginnerusumillu immiaaqqanik viinninik allanillu sanasoqarsinnaalissalluni, minnerunngitsumillu inerteqqutaanngitsumik akitsuutikkut nunatta karsianut iluaqutaasinnaalluni, Atassutip siunnersuummini tunngavilersuutaannut ilaavoq.
Naalakkersuisut: Imigassat aalakoornartortallit pillugit inatsisinik qasukkaasoqassappat peqqissutsimut ulorianarpoq
Peqqissutsimut naalakkersuisoq, Agathe Fontain (IA) ilaatigut akivoq imigassamik atuisoqarnerulernera peqqinnissakkut ajornartorsiutit amerlinerannik kinguneqassasoq ilisimaneqarluarpoq, tassunga ilanngullugit imigassamik pinngitsuuisinnaajunnaarneq, kræftimik nappaatit, uummatip taqarsuaatigut ajoquteqalerneq, imminut toqunneq, nakuuserneq aamma tarnikkut atugarliorneq. Tamanna peqqinnissaqarfitsinnut artukkerneqareersumut suli annerusumik artukkiinermik kinguneqarsinnaavoq.
- Aamma atuinerulernerup kingunerisaanik inunnut ataasiakkaanut, ilaqutariinnut, minnerunngitsumillu meeqqanut inuuniarnikkut kingunerluuteqartitsisinnaanera ilisimaneqarluarpoq. Inuiaqatigiit siusissukkut perortarnerat aarlerinartuuvoq, tamannalu pingaartumik angerlarsimaffimmi nakuusertoqarneranut, aanngajaarniutinik atuinermut aamma kinguaassiuutitigut kannguttaatsuliornermut atatillugu aanngajaarniutinik atuisoqarnissaa, imminut toquttoqarnissaa nakuusertoqarnissaalu ilimanaateqarnerulersarput.
- Taamaattumik imigassap pissarsiarineqarsinnaanerulernerata kingunerisaanik inuttut kingornuttakkat, imminut toquttartut amerlassusaat nakuusertartullu taamaaginnassapput. Ataatsimut isigalugu peqqissutsitsinnut inuiaqatigiinnullu pitsaanerpaasussaq tunngavigalugu tamanik akuutitsilluni oqallittoqassasoq aalajangiisoqassasorlu Naalakkersuisut isumaqarput. Inuiaqatigiinnik nukittorsaataasumik aamma siunissami kinguaassavut eqqarsaatigalugit Kalaallit Nunaat pillugu suleqatigiitta, peqqissutsimut naalakkersuisoq Agathe Fontain akissuteqammini ilaatigut taamak erseqqissaavoq.