Atassut: Inummut ilanngaat qaffanneqarli
SIK'p Siumullu isertitaqqortusseq aallaavigalugu akielraartarnissamik siunnersuuteqarnerannut taarsiullugu isertitakitsunut inummut ilanngaat qaffanneqarli, Atassut isumaqarpoq.
SIK aamma Siumut nalunaarput isertiakinnerpaat atugarisaannik oqilisaaniarluni isertitaqqortussuseq aallaavigalugu akileraartarneqeqqunneqartariaqartoq.
Steen Lynge Atassummi naalakkersuinikkut siulittaasup tullia isumaqarpoq tamanna isumaasoq pitsaanngitsoq. Assigiimmik akileraariaaseqarnikkut kikkut tamarmik sulinerunissaminnut kajuminnerussapput, isertitaqarnerunissaq orniginerullugu qaffasinnerusumillu ilinniarusulerlutik taamaalillutik isertitaqarnerulerlutik.
- Isertiaqqortussuseq aallaavigalugu akileraartarnikkut allaffissornermut aningaasartuuteqarnerulissaagut, Steen Lynge oqarpoq.
Akileraartarnermut atugasissaarnermullu ataatsimiititaliarsuarmi malinnaatitatut ataatsimiititaliarsuarmut siunnersuutigisimavaa inummut ilanngaatip annertuumik qaffannissaa.
- Isumaqataavungali aaqqiisoqartariaqartoq isertitakinnerpaat aningaasaqarnerannik pitsanngoriartitsisumik. Inummut ilanngaatip qaffanneratigut isertitakinnerit maannakkut akissarsiamikkut atugassaqarnerulissapput, annerusumik ilanngateqalernikkut qulakkeerneqassammat isertitakinnerusut annikinnerusumik akileraartalernissaat, Steen Lynge isumaqarpoq.
Inummut ilanngaatip qaffanneranut matussutissatut siunnersuutigaa akileraarutit qaffannissaat.
- Taamatut aaqqiinerup aamma kingunerissavaa, iseritakitsut atugaasa pitsanngortinneqarnerat allaffissornikkut aningaasartuuteqarnerunngikkaluarluni. Isumaqarpunga kikkut tamarmik qanorluunniit isertiaqaraluarunik inummut ilanngaatip qaffannissaa isumaqatigiissutigisinnaassagaat akileraarnerulernissarlu, tamassuma kingunerissammagu isertitakinnerusut pitsaanerusumik atugaqalernissaat akileraartartullu tamarmik naapertuuttumik assigiissumillu akileraarlutik, Steen Lynge oqarpoq.