Atassut: Lars Løkke utoqqatsertariaqarpoq
Danmarkimi statsiministerip Lars Løkke Rasmussenip meeqqat 1951-mi aallartinneqarsimanerannut utoqqatsinnginnera Atassutip siulittaasuata tulliata Qulutannguaq Berthelsenip pakatsissutigaa
- Meeqqat 22-t danmarkimut aallartinneqarsimanerat pineqartunut ilaqutaasunullu assorujussuaq ikiliisimasut tamanna pillugu Lars Løkke Rasmussen utoqqaterusunnginnera pakatsissutigeqaara.
Atassutip siulittaasuata tullia Qulutannguaq Berthelsen tusagassiutinut nalunaarummi allappoq, taamatut misiliisimaneq kukkusutut aamma nalilerpaa.
- Ilaqutariit ukiorpassuarni suli maannamut ikeq annertooq oqimaattorlu anniaatigivaat taakkulu utoqqatsertoqarnissaanik kissaateqarput aammalu inuiaqatigiinnut tamanut utoqqatserneq oqiliallannermik kinguneqassaaq, Qulutannguaq Berthelsen naqissusiivoq.
Lars Løkke Rasmussenip aamma Kim Kielsenip sapaatip akunnera kingulleq isumaqatigiissutigaat suliaq sukumiisumik misissorneqassasoq. Tamanna aamma akerlilerneqarpoq.
- 1951-mi pisut oqaluttuarisaaneq inuiaqatigiinni ukiorpassuarni sammineqareerput aamma atuakkatigut saqqummiunneqartareerlutik taamaattumik kinguarsaataanginnassaaq misissuisoqaarnissamik suliaqaqqaarniarneq. Inuit pineqartut ukiorpassuarni utaqqinerat akuersaarneqarsinnaanngilaq, Atassutip siulittaasuata tullia oqarpoq.
- Akuersaarneqarsinnaanngilarmi meeqqat misileraatitut nunamut nalusaminnut aallartitaasimanerat, ikiliineruvoq maminneqarsinnaanngittoq tamannalu inuiaqatigiinnut sunniuteqarpoq puijungassaanngittumik. Taamaattumik utoqqatertoqarnissaa kissaatingaara meeqqat taama pineqartussaanngillat misileraatitut, Qulutannguaq Berthelsen oqarpoq.