Atassut: Nunaqarfiit sakkortuumik eqqugaassapput

Nunaqarfiit isorliunerusullu sakkortuumik eqqugaassapput aningaasanut inatsisissaq maannamut isikkumisut illuni atuutsinneqassagaluarpat, Atassut isumaqarpoq. Naalakkersuisunut allakkammi ammasunik Naalakkersuisut nunaqarfiit pillugit sipaarniuteqarnissamik siunniussaqarnerat Atassummit unitsinniarneqarpoq, nunaqarfinni inuussutissarsiutitigut ineriartortitsinissamillu misissuinerit naamassineqarnissaasa tungaanut.

- Siunnersuut inuppalaassuseqanngilluinnarpoq aammalu nammaqatigiikkusussuseqanngilluinnarlunilu pingaartumik nunaqarfiit isorliunerusullu sakkortuumik eqqugaassapput Naalakkersuisut 2010-mut aningaasanut inatsisissaat akuersissutigineqaraluarpat, Atassut isumaqarpoq.

Naalakkersuisut Aningaasaqarnermut Naalakkersuisoq aqqutigalugu Kalaallit Nunaanni inuit nunaqariaasiat paasiniarlugu suliamik ingerlatsisoqarnissa kissaatigaat.

- Tamanna immineq ajoquteqanngilaq akueriuminaallunilu isornartoq uaniippoq, Naalakkersuisut suli paasiniaasoqanngitsoq taamaattumillu suli takussutissaqanngitsoq, siumoortumik sipaarniutissat annertuut nunaqarfinni isorliunerusunilu inuussutissarsiornermik sakkortuumik eqquisussat aallartisarniarmatigit, Atassut allappoq.