KNR kukkuluttoreersoq
Atassut: Tusagassiutit naqisimaneqannginnerat innarligassanngilaq
Atassut isumaqarpoq KNRip Nikku Olsenillu saqitsaannerat unittariaqartoq
KNRip ilumini emailikkut attaveqatigiittarsimanini Nikku Olsenimut takutittariaqanngilaa. Taama isummerpoq Atassutip siulittaasua Gerhardt Petersen Nikku Olsenip KNRillu akornanni aaqqiagiinnginnermut oqaaseqarnermini.
Nikku Olsenip eqqartuussissuserisoq KNR pillugu imippaa piumasaralugu KNRip ilumini emailikkut attaveqatigiittarsimanera takujumallugu. Taama iliorpoq Adolfimut assersuunneqareerluni, Nikkullu qularinngilaa Adolf Hitlerimut assersuunneqarluni. Atassummiulli isumaqarput KNR tunniussisariaqanngitsoq.
- Naqisimaneqanngitsumik tusagassiisarneq pingaarutilerujussuuvoq innarlernaversaagassaq. Pisimasumi uani KNR iliuuseqalertornikuuvoq aammalu ingerlaannaq kinguneqartitsilluni, Atassutip siulittaasua Gerhardt Petersen Sermitsiaq.AG-mut oqarpoq.
KNRip nittartagaani aaqqissuisuugaluartup Peter Troelsenip Nikku Olsen Adolfimut assersuuppaa Nikkullu qularinngilaa tamanna Adolf Hitlerimut assersuussinerusoq. Ulloq taanna nittartakkami aaqqissuisuugaluartoq soraarsitaavoq. KNR aamma Naalakkersuisunut nalunaarusiorpoq tassanilu naqissuserneqarpoq pisimasoq ataasiaannartumik pisuusoq. Taamaattumik iliuuseqaqqittoqartariaqanngitsoq Atassut isumaqarpoq.
Demokraatit siulittaasuat Jens B. Frederiksen KNRimut tapersiivoq. Taanna isumaqarpoq naqisimaneqanngitsumik tusagassiuteqarneq Nikku Olsenip paatsoorsimagaa.
Ilinniartitaanermut, ilageeqarnermut, kulturimut naligiissitaanermullu naalakkersuisoq Nick Nielsen Siumumeersoq aamma suliami uani iliuuseqaqqinnianngilaq. Taassuma aamma KNR-mut tapersiinini nalunaarutigereerpaa.