Atassutip sakkortuumik isorinninneq tunuartippaa
Sisimiuni Atassutip immikkoortortaqarfiani siulittaasup Timooq Mølgaardip partiimit aninerminut nassuiaataa upperinngilaa
Partii ajornartorsiortoq Atassut aporfissarpassuaqarpoq.
Taamaasilluni Atassutip Sisimiuni immikkoortortaqarfiani siulittaasoq Mette-Sofie Lerch isumaqarpoq, Timooq Mølgaard, ilisimaneqartutut sapaatip akunnerani kingullermi Atassummit anisoq, tunngavissaqanngitsoq partiip siuttui pisuutissallugit partiip nunami tamarmi immikkoortortaqarfini sumiginnarai.
Timooq Mølgaardip Atassutip siuttuinik oqaluttuarnera ilisarisinnaanngilaa, taassuma ilaatigut partiip siuttui pisuutimmagit Qeqertarsuarmi immikkoortortaqarfimmik naammattumik suleqatiginninngitsutut.
Atuaruk "Atassut inuulluarit: Tamaattumik Siumut toqqarpara"
Allat pisuutippai
- Nalunngilara Atassutip qullersaasa immikkoortortaqarfiit tamaasa attaveqarfigisartorujussuugaat. Immikkoortortaqarfiit tamarmik tamatigut angisuunik mikisunillu paasissutissinneqartarput mail-ikkut telefonikkullu. Siuttunit attaveqanngittarnermik, suleqateqannginnermik tapersersorneqannginnermillu Timooq Mølgaardip oqarnera ilisarisinnaanngilara. Tamanna eqqunngilaq, Mette-Sofie Lerch Sermitsiaq.AG-mut erseqqissaavoq.
- Isumaqarneruvunga nammineq partiip siuttuinik naammattumik attaveqarneq ajortoq, oqarusuppungalu taamatut pasilliiniartoq allanik pisuutitsiniaannavilluni, Mette-Sofie Lerch oqarpoq.
Atuaruk "Sten Lund: Partiimit nikinneq eqqumiitsoq"
Isorinninneq tunuartippaa
Apersorneqarluni Timooq Mølgaard ilaatigut oqarsimavoq Atassutip siuttuisa aamma kommunimut qinersinissaq piareersarsimanngikkaat, nammineq oqarnera malillugu arlaleriarluni tamanna nukingisaarutigisarsimagaluarlugu.
Mette-Sofie Lerch naapertorlugu tamanna aamma eqqunngilaq.
- Siuttut oktobarimiilli immikkoortortaqarfiit tamaasa tusarniaavigisimavaat kommunimut qinersinissamut piareersarnerit pillugit. Tassami imaappoq, kommunimut qinersinissanut immikkoortortaqarfiit namminneq piareersartarput, siuttulli suleqatigalugit. Siuttullu sapinngisartik tamaat malinnaaviginiartarpaat immikkoortortaqarfinni tamani piareersarnerit qanoq ingerlanersut. Oqaatigineqareersutut siuttut ataavartumik immikkoortortaqarfinnik tamanik mail-ikkut attaveqarlutillu telefonikkut ataatsimeeqateqartarput, Mette-Sofie Lerch tikkuaavoq, ilanngullugulu oqaatigalugu Timooq Mølgaardip suleqatigiinnginnermik oqaasii pissuteqarsimassasut Timooq Mølgaardip nammineq suleqatigiinnissamut naammattumik iliuuseqarsimannginnera, utaqqiinnarlunili.