Atassutip siunnersuutissai tamarmik itigartinneqaqqipput
Piffissaq tunniussivissaq minutsinik pingasunik qaangerlugu partii tunniusseriaraluarpoq. Atassutip siorna upernaakkut ataatsimiinnermut siunnersuutissaralui tamarmik itigartitsissutigineqarput
Atassut partiiata Inatsisartut upernaakkut ataatsimiinnissaannut tallimanngornermi apriilip 13'ianni aallartittussamut siunnersuutaat tamarmik itigartinneqarput.
Sermitsiaq.AG'ip paasinninnera naapertorlugu Siulittaasoqarfiup marsip 13'ianni ataatsimiinnerminni Atassutip siunnersuutai arfinillit itigartinneqaput. Ilaatigut pissutigalugu siunnersuutit tallimanngornermi marsip qulingiluaat nal. 12.00 tunniussivissaq minutsinik pingasunik qaangerlugu tunniunneqarmata aammali pissutigalugu siunnersuutit ilusissamissuk iluseqaratik tunniunneqarmata. Atassut partiiata allaffeqarfia maannakkorpiaq inuttassaaleqivoq erninermut atatillugu aammalu napparsimasoqarnera pissutigalugu sulinngiffeqartoqarmat.
Atassutip Inatsisartunut ilaasortaatitai marluk Siverth K. Heilmann aamma Knud Kristiansen, aalajangiiffigisassatut siunnersuutit pingasut aamma apeqquteqaatit pingasut tunniuteriaraluarpaat, maannakkulli tassa ilaasortat allat naalakkersuisullu siunnersuutaat aqqutigalugit politikkiminnik ersersitsisariaqalerput.
Siunnersuutit oqaluuserineqarnissaminnut itigartissutaasut ilaatigut imerniartarfiit ammasarnerisa akunnernik marlunnik sivitsorneqarnissaannik, nunatsinni innuttaasut suliffeqarfinnik rubininik tuniniaanermik ingerlatallit aallartitsisinnaanerinut aamma ingerlatsiviit nunaqavissunit pigineqartut aallartinneranni ukioq siulleq akileraarutinik akiliisinneqartassannginnerinik imaqarput.
Atassutip 2011 upernaakkut ataatsimiinermi siunnersuutai tamarmik aamma itigartitsissutigineqarput suleriaat naapertorlugu ilulissartik ilusiginngimmassuk.