Ateq ilisarnaallu unammissutigalugit
Kommunit nutaat nutaanik atertaarlutillu ilisarnaatitaartussaapput. Unammisitsinerit aallarteruttorput, ikaarsaariarnermullu ataatsimiitsitaliat atit nutaat ilisarnaatissallu nutaat kingusinnerpaamik aggutsip aallaqqaataani toqqareersimassavaat.
Kujataata kommuniata ikaarsaariarnermut ataatsimiitsitaliaata atissamik ilisarnaatissamillu unammisitsineq tamanut ammaateqqammerpaat, maajip 31-ianut killilerlugu, Qeqqata Kommuniani siunnersuutit ikaarsaariarnermut ataatsimiitsitaliap aggutsip aallaqqaataa nallertinnagu toqqaavigisassaat tigoreersimalerpaat.
Ikaarsaariarnermut ataatsimiitsitaliat atertaassanut ilisarnaatitaassanullu siunnersuutit angumeriniassagunikkut nukingertariaqarput.
Qeqqata Kommuniani Sisimiut Maniitsullu kommuuniinneersuni unammisitsineq februaarimili aallartinneqarsimavoq, siunnersuutillu 164-it tiguneqarsimalerput, 75-it kommunip ilisarnaatissaanut siunnersuuteqarsimallutik, kommunit kattunnissaannut siunersorti Hans Henrik Olsen paasissutissiivoq.
Qeqqata kommuniani ikaarsaariarnermut ataatsimiititaliaq maajip 20-iani atissamut siunnersuutinik pitsaanerpaanik 12-nik kommunillu ilisarnaatissaanut siunnersuutinik 20-inik saqqummiussivigineqartussaavoq.
Avannaata kommunerujussuassaani unammisitsinissamut atortussat ulluni qaninnerpaani tamanut saqqummiunneqassapput, tunniussinissamullu piffissaliussaq juulip 1-ianut killilerneqarsimalluni, ikaarsaariarnermut ataatsimiititaliami siulittaasoq Jess Svane paasissutissiivoq.
Kangia-Kitaata kommuniani piareersarnerit aatsaat aallartinneqarsimapput. Kiista Lynge Høegh ikaarsaariarnermut ataatsimiititaliap allattoqarfianeersoq ilisimatitsivoq, suliaq tamanna aningaasaqarnermut ataatsimiititaliap sapaatip akunnerata tulliani oqaluuserissagaa.
Unammisitsinermi piumasaqaatit malittarisassallu uani atuarneqarsinnaapput www.kanukoka.gl.-imi.