Attaveqaatit ajorneri innuttaasunit arlalinnit malugineqarpoq
Nuuk sapaatip akunnerata siuliani qamittoormalli nuna tamakkerlugu innuttaasut internetimik, oqarasuaatit attaviinik, radiop aamma TV-p attaviinik ajornartorsiuteqartarsimapput.
TV radiolu attaveqanngitsut internetillu attavia kipisaqattaartoq.
Nuna tamakkerlugu innuttaasunit tamakku nalaanneqartaarput.
Tusass nittartakkamini ilisimatitsivoq attaviit ilaat maanna iluarsereersimasut.
Nunalli annersaani TV-kkut radiokkullu attaviit suli iluarsiniarneqarput.
TV sapaatip akunnera attaveqanngitsoq
Sermitsiaq.AG Ilulissani innuttaasumit ilisimatinneqarpoq illoqarfimmi TV-mut radiomullu attaviit sapaatip akunnerata missaani ajoquteqarsimasut.
Tusass ilisimatitsivoq ajornartorsiut nunap annersaani nalaanneqartoq.
- Nunap annersaani TV-kkut radiokkullu attaveqaatit ajoquteqarnerinik takussutissartaqarpoq. Teknikerit sulissutigaat, atortunillu pisiortorfiit attavigineqareerlutik, atortut ajunnginnersut paasiniarlugit, Tusass nittartakkamini allappoq.
Internet unammillernarpoq
Innuttaasut arlallit internetimik attaveqarniarnerat aamma kipisaqattaarsimavoq. Pingaartumik Nuummi internetimik attaveqarsinnaanngitsut arlaqarsimapput.
Tusass naapertorlugu internetimut attaviit maanna iluarsineqarsimalerput, Tusassilu Facebookimini ilisimatitsivoq atuisut attaveqanngitsut modemiminnik aallaqqaataaneertitsisinnaasut imaluunniit sullissivimmut sianersinnaasut.