Attaveqaatitigut ajutoorneq politiinut ajornartorsiortitsisimasoq
Politiit ataasinngornermi ualikkut attaveqaatitigut ajutoortoqarmat mobiltelefonikkut taamaallaat attavigineqarsinnaasimapput. Atortorissaarutilli unnuap ingerlanerani ajunngitsumik ingerlaqqilersimasut, pigaartut pisortaata oqaluttuaraa.
Kalaallit Nunaanni Politiit ataasinngornermi qarasaasiatigut ajutoortoqarmat nalunaaquttap akunnerpassuini attavigineqarsinnaasimanngillat.
Ajutoortoqarnerata malitsigisaanik innuttaasut politiit oqarasuaataannut 70 14 48-mut sianersinnaasimanngillat. Politiit Facebookikkut ilisimatitsissutigaat, mobiltelefonit atorlugit politiit attavigineqartassasut.
- Suut tamarmik ajornarnerulaalersimapput.
- Qarasaasiatigut ajutoortoqarpoq, tamatumalu malitsigisaanik uagutsinnut attaveqarniaraluartut sunnerneqarsimallutik, pigaartut pisortaat Jens Rønberg Sermitsiaq.AG-mut oqarpoq.
Atortorissaarutit nal. 23 ajunngitsumik ingerlaqqilersimasut
Taassuma oqaluttuaraa, ataasinngornermi ualikkut nal. 14-ip missaani attaveeruttoqartoq.
Nal. 20 oqarasuaatit nalinginnaasumik ingerlaqqilerput, nal. 23-lu atortorissaarutit allat nalinginnaasumik ingerlaqqilerlutik.
Pigaartut pisortaata oqaatigaa, ukiuni kingullerni oqartussat allat internetsikkut akornusersorneqartarsimasut assigalugit internetsikkut akornusersuisoqarsimanngitsoq. Matumanili pisumi teknikkikkut ajutoortoqarsimasoq, taanna oqaluttuarpoq.