Narsaq
Atualeqqaat 26-upput
Atuarfiup pisortaata oqalugiarnermini erseqqissarpaa meeqqat atuarneranni angajoqqaat aamma annertuumik akisussaassuseqartut
Ataasinngornermi aggustip 26-ianni Narsami meeqqat 26-it inequnartumik ittuukujullutik atualerput.
Atuarfiup nutaap sananeqarnera pissutigalugu atuarfimmi anitsiartarfik atorneqarsinnaasimanngilaq. Taarsiullugu atualersussat piareersarfiata isuata aqquserngullu akornanni inissaq inissakikkaluartoq atorneqarpoq.
Angajoqqaat akisussaaffeqarput
Atuarfiup pisortaa Ivalo Motzfeldt atualerlaat tikilluaqqullugit oqalugiarpoq. Tamanna peqatigalugu oqaatigaa aamma angajoqqaat qitornamik atuarnerannut annertuumik akisussaaffeqartut, ilanngulluguli oqaatigalugu atuarfik angajoqqaallu ikioqatigiippata meeqqat atuarnerat ingerlalluassaqqaartoq.
Tamatuma kingorna Ivalo Motzfeldtip atualerlaat tamaasa aqqi nalunaarutigineqaraangata ilassiortorpai. Atuartullu erfalasumik tunineqarput, tamatumalu kingorna klassiminnukaapput atuartunngornertik aallartillugu.