Atuarfik: Siusinaartumik iliuuseqarnermi nalunaarutiginninnerit arlaleriarlutik marloriaatinngorput
Nuummi atuarfik ASK siusinaartumik iliuuseqarluni suliniuteqarluni nukarlerni akullernilu qaammatini kingullerni atuartitsisimavoq. Suliat qulingiluat pillugit politiinut nalunaarutiginnittoqarpoq.
- Inersimasut meeqqanut kinguaassiuutitigut atornerluiuaannassappata, taava meeqqat killiliinissamik ilinniartittariaqarpagut.
Oqaatsit taakku atorlugit Atuarfik Samuel Kleinschmidtimi, ASK, ilinniartitsisut marluk siusinaartumik iliuuseqarneq siunertaralugu februaarip naalernerani suliniuteqalerput.
Taama iliornermi politiinut nalunaarutiginninnerit kommunimullu nalunaarutiginninnerit amerleriarujussuarput.
- Nalinginnaasumik ukiup atuarfiup ingerlanerani suliassat marlussuit kommunimut nalunaarutigisarpagut. Qaammatinili marlunni kingullerni nalinginnarmit amerlanerujussuarnik nalunaarusiorpugut, Susse Fleischer, ASK-imi ilinniartitsisoq, Sermitsiaq.AG-mut oqaluttuarpoq.
Susse Fleischer aamma Susanne Storgaard namminneq suliaqarusunnertik aallaavigalugu siusinaartumik iliuuseqarlutik atuaqatigiiaat 14-it aamma immikkut atuartinneqarlutik atuaqatigiiaat tallimat atuartissimavaat. Atuaqatigiiaat peqatiginerini pissutsit amiilaarnarsinnaasut paasineqarput qisuariarfigineqarlutillu:
Qaammatini marlunni suliniuteqareernermi angusat:
- Kommunimut nalunaarutiginninnerit 15
- Politiinut nalunaarutiginninnerit 9
- Atuarfimmi isumaginninnermut siunnersortimik oqaloqateqartalersut 9
Pissutsit suut nalunaarutigineqarsimanersut atuarfimmit ilisimatitsissutigineqarsinnaanngillat, mianernartunik paasissutissaqarmata. Kinguaassiuutitigulli kannguttaatsuliornerit assigisaallu atuarfimmit politiinut nalunaarutigineqartarput, allatigullu sumiginnaanerit kommunimut nalunaarutigineqartarlutik.
Angusat pitsaasut
Susanne Storgaard aamma Susse Fleischer isumaqarput, kommunimut politiinullu nalunaarutiginninnerit taama amerlatigimmata, angusat pitsaasuusut:
- Kisitsisit taakku aallaavigalugit angusagut nalilersorpagut. Oqaatigisassara amiilaarnarpoq. Nalunaarutiginninnerit taama amerlatigimmata, tamanna pitsaasumik angusaqarnertut isigaarput. Takutitsivoq suliaqarnerput pisariaqartinneqartoq iluatsittorlu, Susanne Storgaard oqarpoq nangillunilu:
- Kisitsisit uku takugaanni imaanngilaq ASK atuarfittut ajorluinnartoq. Takutitsiinnarput atuartut pillugit iliuuseqartugut. Atuarfiit tamarmik assigusunik inuuneqartunik atuartuuteqarput. Kissaatigaarput atuarfiit tamarluinnarmik siusinaartumik iliuuseqarnissamut suliniutinik aallartitsissasut, pisariaqartitsisut nassaariuminarneruniassammata, ASK-imi ilinniartitsoq, Susanne Storgaard oqarpoq.
Timi qitiutillugu
Pinnguarneq ataatsimullu sammisaqaqatigiinneq aallaavigalugu ilinniartitsisut atuartunit tatigineqalernissartik sulissutigisimavaat. Atuartitsinermi naaggaarsinnaaneq qitiutinneqarsimavoq, atuartullu suliakkerneqarsimallutik.
- Atuartut taama amerlatigut kommunimut politiinullu nalunaarutigisariaqarsimaneri tupaallannarluinnarpoq. Suliaq pisariaqarluinnarpoq annertoorujussuullunilu, politikeriniillu eqqumaffigineqarnerusariaqarluni, Susanne Storgaard oqarpoq ilanngullugulu oqaatigalugu meeqqat nalingalugit siusinaartumik suliniuteqartarnerit politikerinit eqqumaffigineqarnerusariaqartut.
Atuarfiup neriuutigaa siusinaartumik suliniuteqartarnerup ingerlanneqartarnera ukiut atuarfiusut tamaasa inissaqartinneqarsinnaalissasoq:
- Siusinaartumik suliniuteqarnerup ataavartuutinnissaa pingaaruteqarluinnarpoq. Suliap ingerlaannarnissaa kissaatigigaluarparput, taamaattoqassappalli naammattunik aningaasalerneqartariaqarpugut, atuarfiup pisortaa Hector Lennert Sørensen Sermitsiaq.AG-mut oqarpoq.
Atuarfiup pisortaata nassuiaatigaa corona pissutigalugu kommuni annertuumik sipaarniartariaqartoq. Taamaammat siusinaartumik suliniuteqarnissanut aningaasat naammanngikkallarput.