Brugseni
Atuartunut aningaasarpassuarnik atuaqatigiinnut unammisitsisoq
Atuaqatigiinnut siunissami atuarfiup qanoq ittuunissaanik siunnersuutitsialaqartunut, Kalaallit Nunaanni Brugseni 100.000 koruuninik unammisitsinissaminut piareerpoq
Kalaallit meeqqat atuarfianni atuaqatigiit 8.,9. aamma 10. klassit aningaasarpassuarnik paasisassarsiorlutik angalanissamut atorneqarsinnaasunik eqquisinnaapput.
Tassami Kalaallit Nunaanni Brugseni atuaqatigiinnut, siunissami atuarfiup qanoq ittuunissaanik siunnersuutitsialaqartunut 100.000 koruuninik unammisitsivoq.
- Ilinniarnissamut pitsaanerpaamut suna pisariaqarpa? Qanorlu ililluta ilinniakkaminnik naammassinnittut amerlanerulersissappat? Apeqqutit ilaatigut tamakkuusut inuusuttunit akineqassapput, Kalaallit Nunaanni Brugseni tusagassiuutinut nalunaarummi taama allappoq.
Atuaruk: Brugseni aatsaat taama amerlatigisunik agguagarsititsissaaq
Saqqummiunneqassasoq
Pilersaarutit pitsaanerpaat pingasut toqqarneqassapput, nunatsinnilu tusagassiorfinnut saqqummiunneqassasut, Kalaallit Nunaanni Brugseni ilisimatitsivoq.
Nalilersuisussat tassaassallutik Kalaallit Nunaanni Brugsenip nunami siulersuisunut ilaasortai, taakkulu ajungaasunik toqqaassallutik, ajungaasullu pilersaarusiaat Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisumut, Nivi Olsenimut (D) ingerlateqqinneqassalluni.