Atuartut 357-it atuarfimmit nuutsinneqarput
Atuarfik Kilaaseeqqami inini silaannaluttuni atuartitsineq attanneqarsinnaajunnaarpoq. Pilersaarut aamma aningaasaqarnikkut siunnersuutit sisamanngornermi oqallisigineqassapput.
Maniitsumi Atuarfik Kilaaseeqqami atuartut ilinniartitsisullu qaammatini arlalinni atuarfiup silaannaa pissutigalugu toqqissisimanatik misigisimapput.
Suliniutit assigiinngitsut kommunalbestyrelsimit aallartinneqarput, atuarfillu oqoqarnera pissutigalugu nutarterneqarpoq. Atuartulli ilinniartitsisullu suli toqqissisimanngillat, klassinilu assigiinngitsuni suli silaannalunnera misigisarpaat.
Kingullermik ilinniartitsisut peqatigiiffiat, IMAK, ilinniartitsisunut sullivimmi avatangiisit pitsaanerunissaannut atuartunullu ilungersuuteqarput, kommunalbestyrelsimullu ammasumik allagaqarput, atukkat pitsaanerulernissaannik sulissuteqaqqusillutik.
Aaqqiissutissat sisamanngorpat oqaluuserineqassapput
Maanna atuartut 357-it aamma ilinniartitsisut 44-t tamarmiusut atuarfimmit illoqarfimmi ininut allanut nuunneqarnissaannik Qeqqata Kommunia aalajangerpoq.
Qeqqata Kommunia nittartakkamini taama ilisimatitsivoq.
- Piffissami qaninnerpaami init atuartitsiviusinnaasut piaartumik suliarineqassapput, piaartumik nuuffigineqarnissaat anguniarlugu. Atuartunik allaffinnillu nussuinissaq suliaavoq annertooq, taamaattorli meeqqat ilinniartitsisullu peqqissusaat salliutillugu pingaarnersiuineq ingerlanneqassaaq, kommuni allappoq.
Aalajangernissamut oqaluuserisassaq Qeqqata Kommuniata nittartagaani suli saqqummiunneqanngilaq. Kisianni nuutsiterinissamut pilersaarutit kommunalbestyrelsimut qaqinneqassapput oktoberip 26-ani, tassani allaffissornermi piareersaatit aningaasartassaalu saqqummiunneqassallutik, kommuni ilisimatitsivoq.