Atuartut kaasarfimmioqarunnaarput
Atuartunut angajullernut tapiissuteqarnissamut tunngavissaarussimavoq.
Atuartut angajulliit aggustimi ukiumi atuarfiusumi nutaami atualerunik landskarsimit kaasarfimmiulerneqartarunnaassapput.
Inatsisartut maanna ataatsimiinnerminni tapiissutip peerneqarnissaa oqaluuseraat, kulturimullu, ilinniartitaanermullu, ilisimatusarnermullu ilageeqarnermullu naalakkersuisup Mimi Karlsenip, Inuit Ataqatigiit, Siumut Atassullu sakkortuumik akerliliigaluartut, siunnersuutip amerlanerussuteqarnissaa qulakkeereersimavaa.
Tapiissutip peerneqarnissaanut tunngavilersuutaavoq aaqqissuussineq ukiunik 32-inik pisoqaassusilik naleqqukkunnaarsimasoq. Landsrådi 1978-imi aalajangerpoq atuartut angajulliit tapiiffigineqartalissasut, angajoqqaat aningaasarsiornikkut ajornartorsiortut qitornatik atuarsinnaagaluit, ukiuni qulingiluani atuartussaanerup kingorna, atuarfimmit anisittannginniassammatigit.
Ullumikkut meeqqat atuarfianni Atuarfitsialammi atuartut ukiuni qulini atuartussaatitaapput, taamaattumik meeqqat atuarfianni piumassutsimik ingerlaannarnissamut aningaasatigut neqitassaq peerussimalluni.
Ukiumi atuarfiusumi 2007/08-mi atuartut 758-it katilllugit 7.250.000 koruuninik tapiiffigineqarput - tassa agguaqatigiissillugu atuartumut ataatsimut 9.564 koruunit akileraaruteqanngitsut.
Ilaqutariinnut ataatsimiititaliaq isumaliutissiissummini allappoq misissorneqanngisaannarsimasoq atuartut aningaasat sumut atortarneraat, imaluunniit tapiissutit atuartut atuarnerminnik ingerlatsiinnarnissaannik siunertaminnut atuussimanersut.
Inatsisartuni amerlanerussuteqartut, tassaasut Inuit Ataqatigiit Demokraatillu, isumaqarput angajoqqaat pissakinnerusut isumaginninnikkut ikiorneqassasut, atuarfeqarfikkuunngitsoq. Ikinnerussuteqartut, tassaasut Siumut Atassullu, isumaqarput tapiissutit annikitsumik akunnattumillu aningaasarsiortunut pingaaruteqartorujussuusut, tamakkua ukiuni makkunani tatineqartorujussuummata, tapiissutillu peerneqarnerat inuttut kinguneqarnerlussinnaammat.
Siunnersuut maajip tallimaanni pingajussaaneerneqassaaq.