atuarfiit navianartut
Atuartut Narsap atuarfia qimassavaat
Ilulissani Atuarfik Mathias Storch kisimi pinnani aammali Narsap Atuarfia peqqinnissamut ulorianaateqarmat qimanneqartussanngorpoq
Ilinniartitsisut atuartullu Narsap atuarfiani nappaalajualermata Kommune Kujalleq aalajangerpoq Narsap atuarfiani atuartitsineq unissasoq. Atuarfiup iluarsartuunneqarnissaa kommunep nukingisaarutigaa.
Atuaruk: Ilulissat: Atuarfik Mathias Storch matuissaaq
Kommune Kujallermi atuartitaanermut meeqqeriveqarnermullu ataatsimiititaliap ilinniartitsisut, atuartut angajoqqaallu naammagittaalliornerat tusaarniarsimavaat.
Atuaruk: Siunissami sapaatip akunneri tamaasa akerliussutsimik takutitsisassaagut
Radon oqullu
- Ullumikkut atuarfiup ilarujussua radonimik ulorianartumik akoqarpoq. Atuarfiup ilarujussua aamma oqummat matuneqarnikuuvoq, sinneralu ulorianartorsiulersimasutut taaneqartariaqarluni, annertuumillu aserfallassimalluni, Kommune Kujallermi atuartitaanermut meeqqeriveqarnermullu ataatsimiititaliap siulittaasua Karla Egede Bisgaard Siumumeersoq nalunaarpoq.
Atuaruk: Sooq meeqqat atuarfinni ulorianartuni atuassappat?
Narsap Atuarfiata iluarsartuunnissaa kinguaattoorpoq paasinarsimmat suliaq iligimagisamit akisunerussasoq. Aningaasanut inatsit aqqutigalugu 45 millioner koruunit aningaasaliissutaapput, naatsorsuinerilli nutaat takutippaat iluarsartuussineq 68 millioner koruuninik akeqassasoq. Kommune Kujallermiulli utaqqeqqissinnaajunnaarput.
- Ataatsimiititaliap piumasaraa piaarnerpaamik Naalakkersuisoq akisussaasoq atorfilittanilu Narsamukarlutik ajornartorsiup annertussusaa namminneq isiminnik alakkassagaat, tamannalu pisariaqartoq ukiup atuarfiusup matuma naanginnerani, Karla Egede Bisgaard oqarpoq.
Ininik atuartitsiffiusinnaasunik nutaanik Kommune Kujalleq nassaarniarluni aallartereerpoq.