Atuartut nunat avannarliit pillugit ilikkagassaqarnerulissasut

Nunat avannarlerni ilinniartitsisut atuartullu juullimut ammartakkamik tusarnaagassiamik tusarnaarnissamut, internet atorlugu filmilianik suliaqarnissamut allarpassuarnullu qilanaarsinnaalerput. A.P. Møller Fondenimi suliniutinut 11 milliuunit koruuninik aningaasaliivoq.

Aningaasat nunat avannarlerni atuartut imminnut, oqaatsiminnut kulturiminnillu avitseqatigiillutik ilikkagaqarnerunissaannut atorneqassapput.

NAPA tusagassiorfinnut nalunaaruteqarluni allappoq.

Internet atorlugu atuartitsivik ”Norden i Skolen” nunat avannarlerni atuartut ilinniartitsisullu ataqatigiinnerannik nukittorsaalluni ingerlatsivoq.

Aningaasaliissutit digitalikkut atuartitsissutissanut arlalinnut atortussanngorlugit aalajangerneqareersimapput.

Ilaatigut ukununnga:

• Nunat avannarlernit isiginnaagassiat internetikkut takutinneqarsinnaasut. Nunat avannarliit pillugit juullimut ammartagaq tusarnaagassaliaasoq.
• Nunat avannarliit akimorlugit meeqqat suleqatigiissillugit filmeeraliat, kiisalu oqaluttuarisaanermi inuiaqatigiilerinermilu atuartitsissutit.
• Nunat avannarlernit oqaatsit, kulturi inuiaqatigiilerinerlu aallaavigalugit ilinniartitsisunut pikkorissartitsinerit.
• Nunat avannarliit pillugit atuartitsinermut pilersaarusiornermi sakkussat nutartikkat.

Atuartitsissutit amigaatigineqartut

Norden i Skolenimi pilersaarusiornermut pisortaq aamma Foreningerne Nordens Forbundimi atuartitsinermut pisortaq, Thomas Henriksen oqaluttuarpoq atuartitsissutit amigaatigineqartartut.

- Nunat avannarliinit oqaatsit kulturilu pillugit atuartitsissutinik amigaateqartoqartarpoq. Suliniutip suleqatigut peqatigalugit aallartinnissaannut qilanaarpugut. Atuartitsissutip nittartakkakkut ingerlanneqartartup pitsaanerulernissaanut periarfissagissaartorujussuanngorpugut, Thomas Henriksen oqarpoq.