Atuartut ungasissumut nuuttariaqalissasut

Ittoqqortoormiini 9. aamma 10. klassit Kommuneqarfik Sermersuumi kommunalbestyrelsimit atorunnaarsinneqarput.

Angajullerni atuartut siunissami Nuummi Tasiilami atuartalissapput.

- Taamatut suliniuteqarnermut tunngaviuvoq ukiorpassuarni kingullerni Ittoqqortoormiinut ilinniartitsisunik pingaartumik marluinnik oqaaseqartunik atorfinitsitsiniartarnerup ajornakusoorluinnarsimanera. Tamatuma saniatigut aqutsisut ilinniartitsisullu taarseraatikulasimapput. Sulisunik ilinniarsimasunik amigaateqarnerujussuaq atuartut trinini misilitsinnerni soraarummeernernilu angusakilliortarnerannut peqqutaaqataavoq, Kommuneqarfik Sermersuup nittartagaani atuarneqarsinnaavoq.

Angajoqqaanit tapersersuineq

- Kingullertigut ilinniartitsisutut ilinniarsimasut marluk timelærerillu pingasut ukiumi atuarfiusumi nutaami taamaatinnerat atuarfimmut suliatigullu imaannaanngitsumik kinguneqarfiusimapput. Taamaattumik angajoqqaat, atuarfimmi siulersuisut atuarfimmilu sulisut ataatsimeeqatigisarsimavavut. Taakkunani atuartut pitsaanerpaamik iliuuseqarfigineqarnissaat kaammattuutigineqarpoq. Taamaakkaluartoq angajoqqaat kissaatigisimavaat, atuartut ilaqutaqarfigisaminnut attaveqaateqarfigisaminnullu nuutinneqarnissaat. Kissaatigineqartoq tamanna sapinngisatsinnik naammassiniarsimavarput, Kommuneqarfik Sermersuumi piorsaarnermut ingerlatsivimmi atuarfinnut pisortaq Hans Peter Broberg oqarpoq.

Atuartulli amerlanerit Nuummut nuutinneqarnissaat atuarfinnut ingerlatsivimmit sulissutigineqartoq ilanngullugu allaaserineqarpoq.

Atuartunik nuutsitsinneq 2013-ip aallartinnerani pissaaq ukiunilu marlunni atuukkallassalluni.