Augusta: Nukissiorfiit aningaasaqarnermut inatsimmiissaaq
Naalakkersuisooqataasup Atassutip Nukissiorfiit aningaasaqarnermut inatsisissap iluaniiginnarnissaa piumasaraa.
Aningaasaqarnermut naalakkersuisup Per Berthelsenip Siumumeersup ataasinngornermi 2009mut aningaasaqarnermut inatsisissatut siunnersuut nutaaq saqqummiutereeraalu tamanna partiip politikkikkut oqaaseqartartuata Augusta Sallingip KNRimut erseqqissaatigaa.
Nukissiorfik eqqarsaatigalugu naalakkersuisunut ilaasortap siunnersuummi nutaami modelit marluk siunnersuutigai. Modeli siullermi Nukissorfiit sanaartugassanut annertuunut nunatta karsianit atorniarsinnaassasoq, modelilu aappaani Nukissiorfiit aningaasatigut atorfissaqartinani allatigut atorsinnaassagai, nukissuutileqatigiiffik piginneqatigiiffinngoreersimassammat - taamalu nammineerluni aningaasanik atorniarsinnaaleriissalluni.
Sanaartugassanut immikkut ittumik aningaasaliissutissat ilanngunneqassappata aningaasaqarnermut inatsit 299 milioner koruuninik amigartooruteqarfiussaaq, kisianni Nukissiorfiit aningaasaqarnermut inatsisissamut ilaatinneqassanngippat amigartoorutit 65 millioner koruuninut appassapput.
Augusta erseqqissarpaa naalakkersuisooqatigiinni partiit siusinnerusukkut isumaqatigiissutigisimagaat Nukissiorfiit aningaasaqarnermut inatsimmut ilaatinneqassasoq. Tamatumunngalu tunngavilersuutaavoq pineqartoq sukumiisumik misissorneqassammat.
- Atassutip Siumullu inatsisartuni ilaasortaatitaasa alajangereernikuuaat Nukissisorfiit piginneqatigiiffinngortinneqarnissaanut suliaq kinguartinneqassasoq, aammalu ukiaanerani ataatsimiinnermi oqaluuserisassanngortinneqassanngitsoq, Augusta Salling Radioaviisimut oqarpoq.