Avalak aningaasaliiffigineqaqqittalerusuppoq

Kalaallit Danmarkimi ilinniartut peqatigiiffiat, Avalak, ingerlatsinermut tapiissutinik ukiuni tallimani kingullerni pissarsisimanngillat.

Tamanna isumaqarpoq peqatigiiffiup aaqqissuuttagai akisunerulersimasut. Avalak tapiissuteqaqqittalernissamut Naalakkersuisunut maanna noqqaassuteqarpoq, Avalammi siulersuisuunerit ingerlaqqilernissaat anguniarlugu.

Avalak 2018 tikillugu ukiumut 404.000 koruuninik aningaasanut inatsimmit taperneqartarsimavoq. Ingerlatsinermulli tapiissutit peerneqarneranni arlalinnik kinguneqarpoq.

Ilaatigut uku:

1. Atuartunut susassaqartitsinerit ikinnerupput.
2. Immikkoortortaqarfiit naapissinnaangillat.
3. Atuartunut susassaqartitsinerit akisunerulerput.
4. Avalammi ilaasortat ikiliartorput. Kalaallit atuartut, kalaaleqatiminut attaveqartarnerat annikillivoq.
5. Avalak qaaqquneqartillugu angallanikkut aningaasartuutit akissaqarfigineqanngillat (soorlu Folketingimut ataatsimiigiaqquneqartilluta).
6. Avalak ilaasortanit, ilaasortanullu akiligassaqarpoq (ilaasortat, ilaasortaanikullu avalammut aningaasartuutigisimasaanut).

- Avalak Aarhus taavalu Avalak København malugisinnaavaat aningaasartuutikkut ajornartorsiorneq. Ernumanarsinnaavoq qanoq Aarhusimut taavalu Københavnimut kinguneqartoqarsinnaanersoq, immikkoortortaqarfiit matunissaat aarlerinarsinnaalluni aningaasaqarnikkut iluarsiisoqanngippat, Avalak Aarhus aamma Avalak København allapput.

Kalaallit Nunaannut attaveqaat pinagaruteqartoq

Avalammi siulersuisuusut erseqqissaapput ilinniartut peqatigiiffiat nunatsinni inuussutissarsiornermik suliaqartunut attaveqaataasoq pingaaruteqartoq.

- Kalaallit avataani atuartut nunatsinnut atassuteqaanavittarnissaanut avalak pingaaruteqarluinnarpoq. Siornatigut avalak ilaani karrieremessenut ilaasarnikuuvoq taavalu allat ataatsimiisitsinerit peqataaffigisarlugit. Naalakkersuisoqarfiup anguniagaata ilaasa tassaavoq nunatsinni inuit kajumissutsimik sulisut amerlatsissasut, taana suliaq uagut Avalammiittuusugut ingerlapparput.

Avalammi siulersuisut marluususut ilisimatitsipput Avalaap siulersuisuunerisa pilerseqqinniarnissaannut folketingimi ilaasortat ikiortiserineqarsimasut, folketingimilu ilaasortat isumaqataasut Avalaap pingaaruteqarnera pillugu.