Avalak USA-mik suleqarnialerpoq
Danmarkimi kalaallit ilinniagaqartut peqatigiiffiata Avalaap misissornialerpaa Igalikumi isumaqatigiissut qanoq atorluarnerulerneqarsinnaanersoq.
Igalikumi 2004-mi isumaqatigiissut atsiorneqartoq Namminersornerullutit oqartussaniit, USA-miit aammalu Danmarkimiit tunngavigalugu Avalak misissornialerpaa qanoq isumaqatigiissut atorluarnerulerneqarsinnaanersoq, Avalaap siulittaasua Aqqaluk Petersen nalunaarpoq.
Avalak aallaqqaatiutaasumik ataatsimiipput Københavnimi 28. marts. Ataatsimiinnermi najuupput USA-p Danmarkimi aallartitaqarfiani atorfilik Mark Draper aamma Avalammi siulersuisut.
Avalak aammalu USA-miit tikisitaq suleqatigiillutit isumaqatigiissut Igalikumi atulersinneqartoq tigussaasumik aammalu siunissami suliniutaasinnaasut misissussavaat.
Ataatsimiinnermi Avalæaap siulersuisuunerinit uku peqataapput: Rebekka Bisgaard, Mira Maria Kleist, Nuka Qupanuk Egede, Bjork Lange Kristensen, Gerth P. Olsen, Aqqaluk Petersen aamma Hans Peter Berthelsen.
Joint Commiteemi Kalaallit Nunaata, USA-p aamma Danmarkip akornanni suleqatigiinneq Igalikumi isumaqatigiissummik 2004-mi USA-p nunanut allanut minitserianit Colin Powelimit, danskit nunanut allanut ministeriannit Per Stig Møllerimit taamanilu aningaasanut nunanullu allanut naalakkersuisumit Josef Motzfeldtimit atsiorneqartumik tunngaveqarpoq.
Joint Committeemi suleqatigiinneq suleqatigiissitalianit ukunanit ingerlanneqarpoq: Iliiniartitaaneq aamma kulturi, ilisimatusarneq, peqqissuseq, teknologii aamma avatangiisit kiisalu niuerneq, takornariaqarneq, angallassineq aamma logistik.
Avalaap siulersuisuuneri kikkuunnersut uani takusinnaavat.