Avalammut tapiissutit affaannanngortut
Danmarkimi ilinniartut peqatigiiffiata sammisaqartitsisarnermini annikillisaasariarpoq.
![Avalammut tapiissutit affaannanngortut](https://image.sermitsiaq.ag/130998.webp?imageId=130998&width=960&height=518&format=jpg)
Avalammi ingerlatsinermut tapiissutit 404.000 koruuninit 200.000 koruuninut Naalakkersuisunit ikilisaaffigineqarput. Peqatigiiffiup siulittaasuata Hans Peter Møndstedip ilaasortanut ammasumik allagaqaataani tamanna atuarneqarsinnaavoq.
Ikilisaaneq pillugu Avalak paasitinneqarsimanngilaq.
- Januaarip aappaanni tapiissutit kontumut ikineqarmata aatsaat tamanna paasineqarpoq. 2019-imut aningaasanut inatsisip qimerloornerata kingorna, ingerlatsinermut tapiissutitta ikiliserujussuarnissaannik aalajangerneq, aningaasanut inatsisissap pingajussaaneerneqarnerani ingerlaannaq atuuttussanngorlugu aalajangerneqarsimasoq, Hans Peter Mønsted allappoq.
Nassuiarneqanngitsoq
Taamatut annertuumik ikilisaanermut tunngavilersuititsiniarneq Avalammi siulersuisut iluatsissimanngilaat.
- Naalakkersuisuni assigiinngitsut januaarimili tunngavilersuitinniarlugit attaveqarfigisaqattaarpagut, Ane Lone Bagger (S) ilanngullugu – taamaattorli tutsuiginanngitsuinnarmik nassuiaaffigineqarpugut, naggataatigullu ikilisaanermut sipaaniartoqarneranik nassuiaaffigineqarpugut. Sipaarniarneq imminermi tunngavilersuutaanani iliuuseqarneruvoq, tamatumunngalu pisortatigoortumik tunngavilersuiffigineqarnissarput amigaatigaarput.
Annikillisaaneq aamma akiliisitsineq
Avalaap sammisaqartitsisarnermini annikillisitsinissaa sipaarniarnerup kingunerissavaa.
- Sipaaruteqarneq annertuumik kinguneqartitsissaaq, ingerlatsinermut tapiissutaasarsimasut naapertorlugit missingersuusiornikuugatta. Allatut oqaatigalugu, aaqqissuussatta pitsaassusaannik annikillisaasariaqassaagut, imaluunniit aaqqissuussinerni annerni akiliilluni peqataatitsisalerluta.
- Taakku marluutillugit atussagigut ilimanarpoq.
- Aaqqissuussaq tamatuminnga eqqorneqartussaq siulleq tassaavoq, apriilimi seminarertitsinissaq, tassanilu Kalaallit Nunaanni siunissaq pillugu sammisaqartoqartussaavoq, Hans Peter Mønsted allappoq, taassuma ikilisaanermi tunuliaqutaasoq paasisinnaanngilaa.
- Kim Kielsenip nammineq oqarneratut, siunissami inuiaqatigiit kivinniarlugit Kalaallit Nunaanni inuusuttut ilinniarsimasut pisariaqartinneqarput – ilinniakkat tamarmik pisariaqartinneqarput, aamma Nunatsinni ilinniarneqarsinnaanngitsut.