Avannaa angivallaaqaaq

Nunatsinni kommuneqarfiit kattuffianit Kanukokamit aallartitat Ilulissani pingasunngornikkut sisamanngornikkullu ataatsimeersualeruttortut naalakkersuisut siuilttaasuat Hans Enoksen, Siumut, kommunit aaqqissuuteqqinneqarnerannut tupaallatsitsivoq.

– Isumaqarpunga Avannaata kommunia angivallaartoq innuttaminik pitsaanerpaamik kiffartuussinissaminut, Hans Enoksen sermitsiaq.gl-imut oqarpoq.

Aallartitat ataatsimeersuarnerisa nalaani Hans Enoksenip ikaarsaarinarnermut ataatsimiititaliami siulittaasut sisamat qaaqquniarpai "kommunit siunissami angissusissaat pillugu asissuiuitsumik oqaloqatigiinnissamut".

Avannaata kommunia, Atuumiit Siorapalummut isorartussusilik, ukiortaamiit nunarsuarmi kommunit annersarilissavaat 660.000 kvadratkilometerinik angissulik.

Kangia/Kitaata kommunia, Ivittuuniit Sermersuaq itivillugu Ittoqqortoormiinut isorartussusilik, nunarsuarmi kommunit annersaasa tullerilissavaa 635.000 kvadratkilometerinik angissusilik.

Inatsisartut maanna ukiakkut ataatsimiinneranni kommunit kattunnerisa kingorna kommunit aggornilersornerannut inatsisissatut siunnersuummik naalakkersuisut saqqummiussiniarput, tassanilu aallaaviussaaq maanna tikillugu periuseq ilisimaneqartoq, tassa Avannaani kommunit arfineq-pingasut, Qeqqani marluk, Kangia/Kitaani tallimat Kujataanilu marluk.

– Inatsisissatut siunnersuut taanna allanngortinnianngilarput, Hans Enoksen oqarpoq, namminersornerli pillugu innuttaasunik ataatsimiititsisarnerni misigisarsimavara kommunini anginerpaani ungasissuserujussuit innuttaasut ernumanartoqartikkaat Taamaattumik kommunit angissusaat pillugu oqallinnissaq tunuarsimaarfigissanngilarput.

Avannaani ikaarsaariarnermut ataatsimiititaliami siulittaatup Jess Svanep, Siumut, naalakkersuisut siulittaasuata ernumassuteqarnera isumaqatiginngilaa.

– Avannaa angivallaartoq? Tamanna takujumaarparput qinigaaffimmi matumani 2009-miit 2013-imut, Jess Svane sermitsiaq.gl-imut oqarpoq. Tamanna siusinnerusukkut misilinneqarsimanngilaq, misilittakkavullu ilinniarfigisariaqarpavut.

– Kommunitut ilisarnaatissarput, eqqumiitsuliortumit Kristian Flymit titartarneqarsimasoq, ilaatigullu qimussinik assiliartalik, toqqaqqammerparput. Pingaaruteqarpoq Avannaata kommuniani innuttaasut misigisimassasut qimussinut sukkasuumik siumukartsunut ilaallutik. Illoqarfinni nunaqarfinnilu annertuumik nammineq aalajangiisinnaassuseqarnissaq akisussaaffeqarnissarlu pilersaarusiorsimavarput, ilaatigut kiffartuussinermut isumaqatigiissutitigut, taamaattumik innuttaasut sullinneqarnissaat ataatsimuussutsimillu misigisimanissaat ernumanartoqartinngilara.

– Akerlianik kommunalbestyrelsimi inuit qinigaannut tamaviaarnassaqaaq, Jess Svane oqarpoq.

– Ilaasortarput avannarlerpaameersoq, Jens Danielsen Qaanaameersoq, Ilulissani ataatsimiinnermut peqataaniarluni sapaatip akunnera ataaseq angalasassaaq, silalu ajorpat angalaneq sapaatip akunnerinik marlunnik sivisussuseqarsinnaalluarpoq. Taamaattumik kommunalbestyrelsimi ilaasortaanermut akissarsianut malittarisassat atorlugit piniartutut sulineq kommunimilu politikeritut sulineq ataqatigiissikkuminaapput.

– Kommunip ilisarnaataani nutami qimussini innuttaasut tamarmik inissaqarput, Jess Svane oqarpoq.