Avannaa inunnut innarluutilinnut politikkimik nutaamik tusarniuteqarpoq

Innuttaasut tamarmik qanorluunniit inissisimagaluarunik, qaffasissumik pitsaassusilimmik imaqqortuumik inuuneqassapput. Innarluutilinnut politikkimi matumani Avannaata Kommuniani piffissami 2022-2025 innarluutillit pillugit suliniuteqarniarnermi sinaakkutissat takusassiarineqarput.

Avannaata Kommunia inunnut innarluutilinnut politikkimini nutaami taama allappoq, taanna innuttaasunut tusarniaatigalugu nassiunneqaqqammerpoq. Nersualaarnernik isornartorsiuinernillu nassiussinissamut 31. marts killiliunneqarpoq.

Politikki ukkatarisassanut pingasunut avinneqarpoq, taakku inunnut innarluutilinnut politikkimi itisilerneqarput.

Ukkatarineqartut pingasut tassaapput:

• Innuttaasoq qitiutillugu
• Nammineq inuunermik ukkassilluarneq
• Peqataatitsineq inuunerinnerlu

- Avannaata Kommuniata innuttaasut innarluutillit siunnersuinermik, ilitsersuinermik tapersersuinermillu neqeroorfigai peqatigitillugulu kommunip suliniutigalugu innuttaasut innarluutillit inuiaqatigiinni peqataanissaminnut eqqortunik periarfissaqarnissaat, kommuni aallaqqaasiummi allappoq.

Inunnut innarluutilinnut tapersersuinissamut Inatsisartut inatsisaat naapertorlugu, kommunit tamarmik inunnut innarluutilinnut politikkimik suliaqartussaapput.

Periarfissat pisinnaatitaaffiillu assigiit

Innuttaasut innarluuteqarnertik apeqqutaatinnagu, sapinngisamik qulakkeerunneqassapput allat piginnaatitaaffiisa periarfissaasalu assinginik, makku pineqartillugit, nammineq inuunerisamut akisussaaffeqassallutik, qinigassinneqassallutik inuiaqatigiinnilu sunniuteqaqataassallutik, Avannaata Kommunia inunnut innarluutilinnut politikkimini taama allappoq.

Kommunip innuttaasunut innarluutilinnut siunnersuinermik, aqqutissiuinermik tapersersuinermillu sunik neqerooruteqarsinnaaneranik politikkimi itisilerneqarpoq, taamaalilluni inuunerup pitsaassusaa qaffasinnerpaassammat.

Sullissinermut tunngatillugu innuttaasup qitiutinneqarnissaa aamma eqqortumik ikiorneqarnissaanut tapersersorneqarnissaanullu peqataatinneqarnissaa, politikkimi oqaatigineqarpoq. Tamanna ilaqutaasunut qanigisaasunullu tamanna aamma atuuppoq.

Anguniakkat arfineq-marluk

Inunnut innarluutilinnut politikkimi kommuni arfineq-marlunnik anguniagaqarpoq:

1. Innuttaasut innarluutillit sapinngisaat aallaavigalugit peqataatinneqassapput, aalajangiisoqartillugu taassuma inuunera inuunermillu ingerlatsinera pillugit.
2. Suliamik isumaginninnermi innuttaasup qanigisaasa attaveqaataasalu peqataatinneqarnissaat, tamanna innuttaasup kissaateqarnera naapertorlugu.
3. Suliamik isumaginninnerit ataqatigiissaagaallutillu tamakkiisumik isiginninneq toqqammavigalugu ingerlanneqartut innuttaasut misigisinnaassavaat, innuttaasullu inuunerani pingaarutilinnik erseqqissisitsisuussallutik.
4. Suliassamik isumaginninnermi suliassaqarfiit akimorlugit sulinissaq eqqarsarnissarlu.
5. Innuttaasumut suliniutaasut imminnut ataqatigiinnissaat.
6. Inunnik innarluutilinnik sullissinermi suliaqartut suliamut atatillugu pisariaqartunik piginnaasaqarnissaat.
7. Innarluutillit peqatigiiffiinik suleqateqarnerup nukittorsarnissaa.

Avannaata Kommuniata inunnut innarluutilinnut politikkia UANI atuarsinnaavat. Politikkip nukittuffii amigaataalu Avannaata Kommunianut 31. marts sioqqullugu nassiunneqassapput.