Avannaamiut Jens B. taperserpaat
Demokraatit Avannaani sinniisuisa Jens B. Frederiksen taperserpaat immikkullu ittumik ataatsimeersuarnissaq kissaatigaat, tassani nutaamik siulittaasussarsiortoqarnissaa piumasaralugu.
Demokraatit sinnerlugit avannaani ikaarsaariarnermut ataatsimiitsitaliamut ilaasortaq Ane Lone Bagger, Demokraatit immikkoortortaqarfii Qaanaamiittoq, Upernavimmiittoq Ilulissaniittoq Qeqertarsuarmiillu ikaarsaariarnermut ataatsimiititaliamut sinniisussaq Jens Peter Mølgaard suleqatigalugit, Jens B. Frederiksenimut siulersuisuunerillu amerlanerussuteqarlutik siulittaasumik taarsiiniarneq immikkut ittumik ataatsimeersuarnissami pisussaq taperserlugu nalunaarutigaat.
-Massakkut inissisimanerput kissaatiginaanngitsuuvoq. Pisorlu pinngitsoorneqarsinnaagaluarluni, ilaasortat, immikkoortortaqarfiillu massakkut imatut inissisimapput, misigisimallutik inuit marluk partiimik pitsaasumik sulissuteqarusuttumik akornanni toqqaasariaqarlutik.
-Inissisimaffiullu najummassimanartup ajoraluartumik kingunerisimavaa, tusagassiutitigut saqqummiussarpassuit oqaaserpassuillu, naak siulittaasumik toqqaasussanut torernerusumik paasisimannippalaartumillu saqqummiussinissaq perusunnarsimagaluartoq. Taassuma kingunerisaanik ipertuumik torinngitsumillu oqallinneqarluni, piviusorsiortumik tunngaveqarluni imaluunniit demokratiskiusumik aalajangernissamik pilersitsinngitsumik.
Siulittaasumik qinersisoqassappat illoqarfinni immikkoortortaqarfiit Qaanaaq, Upernavik Ilulissat Jens Peter Mølgaard-ilu, Jens B. Frederiksenimut tapersiiniarlutik aalajangereerput, Ane Lone Bagger allappoq.
-Aalajangernermut tunngavilersuutigineqarpoq, Jens B. Frederiksen siulittaasutut inissisimatillugu partiip qullersaat immikkoortortaqarfiillu akunnerminni paaseqatigiilluni oqaloqatigiilluartarneq ineriartorteqqinneqarsinnaasutut periarfissaalluartutut isigigatsigu, sualuppoq Nuup avataani.
Ane Lone Bagger immikkoortortaqarfiit taakku pingasut, sinniisorlu sinnerlugit oqaaseqartup, akueralugu nalunngilluarpaa Per Berthelsen aallartitsisuullunilu partiip pilersikkiartuaarnerani nukiusimasoq pingaarutilik.
-Taamaattorli qularutiginngilarput partiitut ingerlalluarnerup Landstingimi inuit pikkorissut ataatsimut suleqatigiinnerisa inuillu ilungersornikkut suleqataanerisa kingunerisarigaat, inuup ataatsip kisimiilluni suliarinagu. Taamaattumik qularutiginngilara siulittaasumik taarsiiniarneq partiitut aningorneqarsinnaalluartoq, Ane Lone Bagger allappoq.