Avannaata Kommunia: Aalisarnermut inatsisissaq annertuumik ernumatitsivoq
Kommunit tamarmik piumasaqaraluarput tusarniaaneq sivitsorneqassasoq aammalu inatsisissatut siunnersuut sukumiinerusumik oqaluuserineqassasoq. Taamaattorli maanna ilimanarsivoq Naalakkersuisut piffissap aalajangersimasup iluani angusaqarusunnerusut, nunap katersuuffigisinnaasaanik inatsimmik pilersitsinissamut sanilliullugu. Pingaartumik Avannaata Kommunia ernumassuteqarpoq.
Nuna piffissap ingerlanerani mattusersorneqartartumik aalisarnermut inatsiseqarpoq, taamaakkaluartoq tanngassimaarutigineqartarpoq aningaasat nunatta karsianut tassannga isaatinneqarluartut, taamaalillunilu nuna nunarsuarmi nunani aalisarfiusuni avammullu tunisassiortuni annnerpaanut ilaasoq, ukiumummi milliartilikkaat nalinginut avammut tunisisoqartarmat.
Aalisarnermut inatsit ilaartugaq piffissap ingerlanerani annertuumik oqallisaasarpoq arlaleriarlunilumi politikerit sulianik aallartitsisarput millionilikkaanik nalilinnik, kissaataalluni aalisarnermut inatsit nutartigaq, piffissamut naleqquttoq aammalu siunissamut isumannaarisoq anguneqassasoq.
Maanna aamma piffissanngorpoq aalajangersaasoqarnissaanut, Naalakkersuisut piffissaq kingulleq atorlugu aalajangeriasaassanngippata pingaartumik inatsimmik atuisuusut tusarniaanermi akissutimikkut ernumanerminnik ersersitsisut tusaassallugit. Maannamulli ingerlarsortoqarnerata ilimanarsisippaa Naalakkersuisut angusaqarusunnerusut inuiaqatigiit katersuuffigisinnaasaannik inatsimmik pilersitsinissamut sanilliullugu.
Tusarniaanermimi akissuterpassuit qitiusunik pingaaruteqartunillu tikkuussipput, tamakku Naalakkersuisut tusarniaanernut nittartagaanni atuarneqarsinnaapput.
Tusarniaanermi akissut ataaseq qaangiataaginnarneqarsinnaanngitsoq tassaavoq Avannaata Kommuniata akissutaa. Tassanimi aalisarneq ulloq unnuarlu ingerlanneqarpoq, aamma tassannga sinerissap qanittuani aalisarnermit nunatta karsianut isaatitat amerlanerpaapput.
Pisassiissutit sinerissap qanittuani ikilisarniarneqartut avataasiornermi siammarniarneqartut
Ataatsimut isigalugu Naalakkersuisut isumaqarput amerlanerusut, pingaartumik inuusuttut aalisarnermut pulanissaminnut periarfissarissaartinneqarnerusariaqartut, tamanna isumannaarniarneqarpoq illuatungaani aamma sutigut tamatigut naqisusserniagaalluni pisuussutit uumassusillit inuiaqatigiit tamarmik pigisarigaat.
Tusarniaanermi akissutini ataatsimut isigalugu takujuminaatsinneqarpoq inuusuttut amerlanerusut qanoq ilillutik aalisarnermut pulatinneqarsinnaanersut, tassami inatsisissatut siunnersuummi pisassiissutit niuerutigineqarsinnaasut nammineq pigisat (PNNP) atuutilersinniarneqarput illuatungaanilu avataani aalisarnermut tunngatillugu Naalakkersuisut taarsiiffigitinnissamik piumasaqaateqartoqarnissaanik siorasaarneqarlutik.
Sinerissap qanittuani aalisarnermut atatillugu, pingaartumillu aqutsiveqarfik 47-mik taaneqartartumi qaleralinniarnermut tunngatillugu, Avannaata Kommunia isumaqarpoq Naalakkersuisut sukumiisumik nassuiaasariaqartut inatsisissap taamatut ilusilerneqarneranut suna pissutaanersoq ersarissarlugu, aammalu minnerunngitsumik aalisartunut 1.000-it tungaanut amerlassusilinnut ullumikkullu sumiiffimmi aalisarnermik inuussutissarsiuteqartunut siunissaq qanoq allannguuteqassanersoq pillugu nassuiaassallutik.
Avannaata Kommunianit pingaartumik ernummatigineqarpoq inuusutut aalisarnermut pularusuttut, inatsisissaq taamatut iluseqartinneqassappat periarfissaqangaarnavianngitsut aalisartunngornissaminnut:
- Inatsisissatut siunnersuutip periarfissaqartippaa, aqutsiveqarfimmi 47-mi umiatsiaararsorlutik aalisartut, PNNP-mik toqqaanngitsut, aalisarnissamut pisinnaatitsissummik akuersissutaateqartut, qaleralinnairlutik aalisaannarsinnaasut tunisisinnaassallutillu. Kisianni tak. § 28, imm. 4 naapertorlugu pisassat paggatassiissutigineqartartut tamarmiusut annikillissapput, aalisartup pisassani nassarlugit PNNP-mut nuuttut annertoqataanik. Taamaammat paggatassiineq tunngavigalugu pisassiissutaasartut ikiliartupallannissaat naatsorsuutigineqarsinnaavoq. Taamaalilluni paggatassiineq tunngavigalugu pisassat ima ikilitigisinnaapput, allaat aalisartut nutaat inuusuttullu inuussutissarsiummut tassunga appakaassinnaajunnaassallutik.
- Inuusuttut aalisartunngorsinnaanerat kissaatigineqarpat, aallarnisaanerminnilu paggatassiineq tunngavigalugu pisassiissutinik aalisaqataalerlutik, taava inatsimmi qulakkeerneqartariaqarpoq TAC-mi minnerpaaffiliisoqassasoq pisassat ilaasa aalisartunut inuusuttunut paggatassiilluni pisassiissutinik aalisaqataalernissaanni atorneqarsinnaasunik, Avannaata Kommunianit ilaatigut taamak kaammattuisoqarpoq.
Pisassat sumiiffimmi nunaqavissuunngitsunit pigineqartalissapput
Alla Avannaata Kommunianit ernummatigineqartoq tassaavoq, pisassiissutinik akuersissuteqartitsinermi sumiiffimmi aalisarfimmi najugaqartuunissamik piumasaqaatitaqanngitsumik pisassiissutinik akuersissutit tunniunneqartarlutik ingerlatsisoqalissappat, taava inunnit ingerlatseqatigiiffinnillu aningaasaqarnikkut nukittuumik inissisimasunit sumiiffiup avataaneersunit pisassiissutit pigineqartalissasut:
- Misilittakkat takutippaat, pisassanik niuerneq ingerlallualerpat, akit qaffakkumaartut, aammalu pisassat annerpaamik akiliiumasunut tunineqarumaartut. Tamatuma saniatigut inatsisissatut siunnersuutikkut periarfissiissutiginiarneqarpoq kalaallit (allamiullu) aalisarnermut aningaasalersueqataalernissaat, soraarnerussutisiaqalernissamut aningaasaateqarfiit assigisaallu Kalaallit Nunaanni qullersaqarfillit aqqutigalugit, tamanna aamma pissutigalugu akit suli qaffasinnerulersinnaallutik.
- Peqatigitillugu aalisartut angisuunik alallatillit, illoqarfinni anginerusuni najugaqartut, aningaasanik qulakkeerinnissinnaanerat ajornannginneruvoq, aningaaserivinni taarsigassarsiniarsinnaanerat aningaasalersueqataasinnaanerusutullu isigineqarnerusinnaallutik. Tamatuma malitsigissavaa aqutsiveqarfimmi 47-mi pisassat annertunerujartuinnartumik sumiiffimmi immikkoortortanit nunaqarfinniillu annissorneqalernissaat, tassa Avannaani najugaqanngitsunit pisiariartorneqarnermikkut. Siulittuutigisinnaavarput pisassat ilarparujussui aqutsiveqarfimmi 47-miittumi Uummannap Upernaviullu avataanut angallatinut anginerusunut tunineqarumaartut, kingornatigullu aamma Qeqertarsuup tunuani umiatsiaararsorlutik aalisartut PNNP-minnik annertusiartortumik annaasaqarumaartut.
- Tamanna pissutaalluni umiatsiaararsorluni aalisarnerup tunngavia annikillissaaq, aammami kutterit mikinerusut ilanngullugit, kiisalu tunitsiviit ilanngullugit - tamakkulu malitsigisaanik inuussutissarsiutinik ingerlataqartut allat, tassa sumiiffiit ilaanni akileraarutitigut isertitsissutaasartut annikillissapput. Ineriartorneq taamaattoq aallartippat nunaqarfinni aalisakkeriviit matooralernerannik malitseqassaaq, tamaanilu ukiuunerani sikuunerata nalaani aalisarneq periarfissaarutsinneqassalluni, suliffissaaleqinermik kinguneqartumik.
Avannaata Kommuniata tusarniaanermi akissutaa akissutillu allat UANI atuarsinnaavatit.
Sermitsiaq.AG-mit sulissutigaarput ernumassutaasut pillugit Naalakkersuisunit oqaaseqartitsinissarput.