Ussassaarut
Avannaata Kommunia sulisut peqqissuunissaannut akisussaaffeqarpoq
Avannaata Kommuniata sulisut Uummannap eqqaavissuani eqqakkanik ikuallaanermi toqunartumik iioraannginnissaannik qulakkeerinninnissaq akisussaaffigaa. Kalaallit Nunaanni Sullivinnik Nakkutilliisoqarfik taamatut erseqqissaavoq.
Ussassaarut
Ussassaarut
Ussassaarut
Suliffeqarfiugaanni kommuniugaanniluunniit sulisitsisutut, sulisut sulinerminni ulorianartorsiunnginnissaat qulakkeerneqartussaavoq, Sullivinnik Nakkutilliisoqarfimmi pisortaq Casper Kronow Sermitsiaq.AG-mut erseqqissaavoq.
Ilulissani innuttaasoq Jens Peter Schytte februaarip qaammataani Uummannamiinnermini, sulisumik eqqaavissuarmi eqqakkanik toqunartortalimmik dioxinimik kræfteqalersitsisinnaasumik kisimiillu ikuallaasumik takunnikkami nakkutilliivimmut nalunaarutiginnittoqareersoq taamatut oqaaseqartoqarpoq.
- Suliffimmi avatangiisinut inatsit unioqqutinneqarsimappat suliffeqarfiit kommunillu inatsimmik malinneqqusinnaavagut. Suliffimmi avatangiisinut inatsit sakkortuumik unioqqutinneqaraangat Sullivinnik Nakkutilliisoqarfiup suliffeqarfik kommuniluunniit politiinut unnerluutigisinnaavaa, akiligassiissuteqarnermik kinguneqarsinnaasumik, Sullivinnik Nakkutilliisoqarfimmi pisortaq suliffimmi avatangiisit pillugit suliassanik unioqqutitsinermi suleriaaseq pillugu nassuiaavoq.
Kommunimut erseqqissaassuteqarsimaneq
Sullivinnik Nakkutilliisoqarfik Danmarkimi Beskæftigelsesministeeriaqarfiup ataaniippoq, tassa suliassaqarfik Kalaallit Nunaannit suli angerlaanneqarsimanngimmat. Taamaalilluni Nakkutilliisoqarfik eqqakkanik ikuallaasarnermut atatillugu Avatangiisinut Naalakkersuisoqarfiup naggataatigullu politikkikkut aalajangiisartut immikkut akuersissuteqartarnerannut sunniuteqarsinnaanngilaq.
Avatangiisinut Naalakkersuisoqarfik anersaartorfinnut illersuuteqartoqarsimannginnera pillugu ilisimatinneqarami, immikkut akuersissummi piumasaqaatit malinneqarnissaat pillugu Avannaata Kommuniani Avatangiisinut Teknikimullu Ingerlatsivimmut ”erseqqissaassuteqarsimavoq” aalajangersagarlu anersaartorfinnut illersuutini atuinissamik piumasaqaataasoq pillugu erseqqissumik allassimasoq oqaatigisimallugu.
Ussassaarut
Piumasaqaat malinneqanngippat, ammasumik ikuallaanissamut immikkut akuersissut tunuartinneqassasoq, kommunimut allakkami erseqqissaatigineqarsimasoq, Sermitsiaq.AG-mit takuneqarsimavoq.