Avannaata Kommuniata eqqagassalerinermut immikkut akuersissut annaasinnaavaa
Avannaata Kommunia piumasaqaatinik malinninngikkuni eqqakkanik ikuallaasinnaatitaanini annaasinnaagaa pillugu Avatangiisinut Naalakkersuisoqarfik ”erseqqissaassummik” allagaqarsimavoq.
Sermitsiaq.AG-p marlunngormat saqqummiuppaa, sulisoq anersaartorfinnut illersuuteqarani Uummannap eqqaavissuani eqqakkanik ikuallaasimasoq. Ammaannartumik ikuallaanermi pujoq dioxininik ulikkaartoq inuunermik ulorianartorsiortitsilersinnaavoq.
Pisoq Sullivinnik Nakkutilliisoqarfimmut Ilulissaneersumit avatangiisit pillugit ilisimasalimmit Jens Peter Schyttemit nalunaarutigineqarsimavoq. Avatangiisinut Naalakkersuisoqarfik ingerlaannartumik iliuuseqarluni, ”Uummannami eqqakkanik ammaannartumik ikuallaanissamut immikkut akuerisaagallarsimanermut piumasaqaatit malinneqarnissaannik erseqqissaassuteqarsimavoq”.
Piumasaqaatit oqaatigeqqinneqartut
Anersaartorfinnut illersuummik atuisoqarsimannera Avatangiisinut Naalakkersuisoqarfimmi pisortaq Karen Anne Arletht kommunimut ingerlaannartumik qisuariartissimavaa.
Kommunimut allakkami piumasaqaatini nummer 25 Ilulissani Avatangiisinut Teknikimullu Ingerlatsivimmut nalunaarutigeqqinneqarpoq. Piumasaqaat tulliuttumi atuarneqarsinnaavoq.
Ingerlatsivimmut ilanngullugu piumasarineqarpoq, sulisut anersaartorfinnut illersuutinik atuisussaanermut piumasaqaammik malinnissimanerannut uppernarsaammik nassiussisoqassasoq.
Pujoq kræfteqalissutaasinnaasoq
- Piumasaqaatit malinneqanngippata, eqqakkanik ammasumik ikuallaaneq ingerlaannartumik unitsinneqassaaq, ingerlatsivimmut allakkami erseqqissaassutigineqarpoq.
Pisimasoq ilungersunarluinnarpoq, eqqakkanimmi batteriinik kemikaliallu sinnerinik akoqarsinnaasut ammasumik ikuallanneqarnerisigut, pujoq toqunartortalik kræfteqalersitsisinnaallunik dioxininillu inuunermut ulorianartorsiortitsisinnaasumik akoqartarpoq.
Aamma atuaruk: Ilisimasalik: Eqqakkat akisussaassuseqanngitsumik ikuallanneqarput
Kommunimut allakkami erseqqissaassutigineqarpoq, nunaqarfinni arlalinni eqqakkanik ammasumi ikuallaasinnaanermut immikkut akuersissut ukioq manna martsip 14-iani atorunnaassasoq.