isummersoqataagit
Aviisimi pingaarnertut allaaserisaq: Løkke tusagassiortunik oqaloqateqarumanngitsoq
Ministeriunerup Lars-Løkke Rasmusseni qaammatini arlalinni eqqarsarfissaqareerluni AG-mit apersorneqarnissaminut itigartitsivoq. "Tamanna ministeriunerup tulluarissavaa, maannakkut pisunut aamma taamatut ataqqinnikkaluaruni" AG-mi pingaarnertut allaaserinnittup De Amerikanske Jomfruøerne-nut (siornatigut De Vestindiske øer) qeqertat USA-mut tunineqarnerannit ukiut 100-t malunnartinniarlugit aqqusaarneranut innersuussiutigaluni allappoq.
DANMARKIMI NAALAKKERSUISUT SIULITTAASUATA soorunami imminut isumagisumik tusagassiorfinnut amerligaluttuinn artunut tamanut apersorneqarnissani akuerisarsinnaanngilaa. Ministeriunerup Lars-Løkke Rasmussenip piffissaq suliffissani sakkortoorujussuarmik pingaarnersiortussaavai. Ulloq unnuarlu taamaallaat aalajangersimasunik akunneqarpoq, suliassallu amerligaluttuinnarput. Akerlianik pissutsit tamakkorpiaat tusagassiorfiit ilaat ungaqqutaarneqarnissaannut naleqquttumik tunngavilersuutaasinnaapput. Tamannalu Lars-Løkke Rasmussenimut aamma taamaagunarpoq, tassami qaammatini arlalinni eqqarsarfissaqareerluni AG-mit apersorneqarnissaminut itigartitsivoq.
52-INIK UKIULIK VENTRENI siulittaasoq peqataappat peqataanngikkaluarpalluunniit aviisi aniguissajunnarsivoq. Aamma ima inatsiseqanngitsoq ilisimavarput ministeriunermik apersuinissamut tusagassiuutinut piumasaqarsinnaatitaasumik. Kisiannili aamma nipaappallaarnerit qoqianngunarsisinnaasarput. Iluarsiinngitsoortarnerit pillugit politikkeqarunarpoq, tassa naalagaaffeqatigiinnermi politikkikkut qullersaq aamma Danmarkimi tusagassiuutinut ministeri danskit kalaallillu akornanni pissutsit maannakkut pisut pingaarutilerujussuit pillugit oqaaseqarumanngiffiit. Naalagaaffeqatigiinneq aatsaat taama ajornartorsiorfiutigaaq, aamma Lars- Løkke Rasmussen kalaallimit tusagassiortumit itisiliilluni apersorneqarmalli qanganngorpoq, taamaattoqarsimassaguni. Sammisassat amigaataanngeqaat. Camp Centurymiit, Pituffimmi sullissinissamik isumaqatigiissummut annaasamut, kalaallit namminiilivinnissaat, namminersorluni inuussutissarsiutini ineriartortitsinerit aamma Kangilinnguit ministeriunerup danskit kalaallillu nalinginnaasumik siunissaat pillugit isummersuutai, pingaanerit tulleriaarlugit ilanngutilaaginnarlugit.
LARS LØKKE RASMUSSENIP matuma qulaani sammisanut kalaallit innuttaasut peqataatinnissaannut piumassuseqannginnera ministeriunerup ataqatigiinneq aamma naalagaaffeqatigiinnermi pitsaassutsit eriagisariaqartut pillugit oqalugiarneranut akerliulluinnarput. Aap, kalaallit tusagassiorfiannut akinissamut piffissaq sivisuvoq allaat. AG-mit apersuinissamik apeqqutilliissut siulleq siorna novembarip ulluisa 29-anni nassiunneqarpoq. Aatsaat qanittukkut – qaammatit marluk qaangiutereersut – akissut itigartitsissut takkuppoq. Tullianik aviisi siuleriiaanut pisimanersoq imaluunniit saaffiginninneq itigartitsissutigineqavissornersoq akiterusupparput. Kingunitsianngua Københavninimi Slotsholmenimi ministeriuneqarfimmit akissut takkuppoq: Qujaannarpugut. Saaffiginninnerpassuit naatsumik tunngavilersuutaat. Qaammatini marlunni ministeriunerup kalaallit tusagassiorfiannut taamaalillunilu tamanut nalunaaquttap akunnera ataatsimik piffissaqarfigilaarnissaa ajornarsimavoq. Aamma siunissami taamaakkumaartoq naatsorsuutigissavarput. Taamaalilluni danskit pissaaneqaramik pingaakujunniarnerat danskini kalaallinilu politikerini taamaallaat takussaanngitsoq paasinarsivoq. Tusagassiorfiit aamma taamatut pineqartarput.
MINISTERIUNERULLI QAAMMAMMI kingusinnerusukkut Mexicomi namminersorluni inuussutissarsiutinik siuarsaaniarnermi De Amerikanske Jomfruøerne-nut (siornatigut De Vestindiske øer) qeqertat USA-mut tunineqarnerannit ukiut 100-t malunnartinniarlugit aqqusaarnera nuannaarutigineqarsinnaavoq. Tamanna oqaluttuarisaanermik ataqqinninnermik takutitsineruvoq, Lars-Løkke Rasmussen Danmarkip nunasiaatiliusimasutut inussiaateqarfiusimasutullu nunaasimanera innersuussutigalugu oqarpoq. Oqaluttuarisaanermik ataqqinninnermik takutitsineq soorunami kusanarpoq. Tamanna ministeriunerup tulluarissavaa, maannakkut pisunut aamma taamatut ataqqinnikkaluaruni.
AG nutaaq
AG-p pingasunngorneq Arnat ulluat malunnartinniarlugu Nuummi utoqqaat angerlarsimaffianni Ippiarsummiunik immikkut allaaserinnippoq
AG-mit arnat pingasut pulaarneqarput. Anguniagassaqaqaaq kisiannili arnat ulluinnarni inooriaasiat allanngornikooqaaq. Allaaserisaq atuaruk: Anaana inuusukkallarmat
Kimmernaq Kjeldsen sapaatip akunnerani isummersuut allaaserivaa: Isiginnaartartut unneqqarissut
Arnaq maligassiuvisoq politikerilu Henriette Rasmussen qanittukkut toqukkut qimaguttoq inuulluaqquneqarpoq: Henriette imatut eqqaamavarput
Avisimik pisartagaqanngikkuit linki toorlugu akiliillutit pisartagaqalersinnaavutit.
Aliikkutarilluarisiuk.