Bandidos-rocker-it hashimik eqqusseriartut pineqaatissinneqartut
Angutit 26-50-inik ukiullit sisamat Nuummi eqqartuussivimmi hashimik 5 kilomik arlaleriartukkaanik eqqussisimasutut pineqaatissinneqarput.
Angutit pineqaatissinneqartut sisamaasut ilaat marluk rockerinut Bandidos-inut attuumassuteqarput. Aappaa Bandidosiniit qanittukkut anisitaasimavoq, aappaalu Kalaallit Nunaanni ukiuni arlalunni najugaqartuusoq Bandidosinut siusinnerusukkut tamatigut tamaana ilaasarsimavoq (Hang-around).
- Taanna qularnanngitsumik rockerinut toqqorniarluni maanga qimaasimavoq, Finn Jeppesen, ikiaroornartulerisuneersut pisortaat oqarpoq.
Finn Jeppesenip eqqoriarpaa, Bandidosikkut qimaaniku aqqutigalugu anngiortumik eqqussiniarnermut akuliussimasut, qimaasup taassuma ukiorpassuarni maaneereerluni nunamut hashimik anngiortumik eqqussuinissamut annertuumik periarfissaqartoq.
Angutit sisamat taakku angalanerit arlallit atorlugit hashimik 5 kilomik anngiortumik eqqussisimassangatinneqarput.
Sisamaasunit pingasut Nuup Eqqartuussivianit ukiuni marlunni pineqaatissinneqarsimasunut inissiisarfimmiittussanngorlugit pineqaatissinneqarput. Kingullersaat ukioq ataasineq inissiisarfimmiitussanngortinneqarpoq, pineqaatissinneqarninilu akueralugu. Aningaasat katillugit 370.750 kronet arsaarinnissutigineqarput. Pineqaatissinneqartut aamma suliami aningaasartuutaasimasut akilissavaat.