Bentiaraq Ottosen (A): Napaattooq utoqqatsissutissarsiorpoq
Naleqqap Inatsisartunilu partiit allat akornanni eqqissiviilliorneq annertusiartorpasippoq. - Napaattuup nilialluni oqaatsitigut uannik saassussinera sakoortunerujussuuvoq utoqqatsissutissarsiorluni nipituujunerarluni oqaannarneranit, Ottosen Sermitsiaq.AG-mut oqarpoq.
Nunatsinni inatsisiliortussatut qinikkat akornanni saammaasseqatigiinnissamut ungasittorujussuartut isikkoqarpoq.
Partiit Inuit Ataqatigiit, Siumut, Demokraatit aamma Atassut peqatigiillutik Inatsisartut siulittaasoqarfiannut Naleqqap ilaasortaatitaasa pissusilersuutaat pillugu naammagittaalliorneranni assersuutitut atorlugu atia taaneqartoq Sermitsiaq.AG-mit oqaloqatigiaarput:
- Assorujussuaq tujorminarpoq suleqammit taamatut saassunneqarneq. Ulloq taanna suliassakka ulapputigalugit allaffinniippunga, quiartussallungali torsuusakkoortillunga Jens Napaattooq naapippara.
- Sillimanngitsunga tassanngaannaq mittarfissarsuit pillugit appisaluutilerpaanga oqaluullungalu politikkimigooq nutaajugama silassorissutsikkut inorsartunga mittarfissallu pillugit kukkussutsikka takusinnaanngikkikka, naggataatigullu sianiitsuunerarlunga akerartorlunga. Oqaatsitigut saassussiinnanngilaq, aammali nipi atugaa aporaannissamut aallarniiniartutut ippoq. Naammassinissaata tungaanut oqalutsiinnarpara nilliatiinnarlugulu. Taamaattorli pisoq sakkortungaarmat, ulloq taanna suliassakka nangissinnaannginnakkit allaffiga qimaannarlugu angerlarpunga, Bentiaraq Ottosen Sermitsiaq.AG-mut oqaluttuarpoq.
Partiit torsuusaanni pisartut tujorminartut
Jens Napaattooq Sermitsiaq.AG-mut nassuiaanermini oqarpoq inunnguutsiminik nipituujulluni:
- Oqalukkaangamalu oqaluinnakassattunga ilaasa paasisarpaat nilliasunga naqqissuisungalu, taamaattoqanngilarli, isumapiloqarnanga inuttut pissusera atuinnartarpara, Jens Napaattooq Sermitsiaq.AG-mut siusinnerusukkut oqarpoq.
Taamaattorli Bentiaraq Ottosen oqaluttuarpoq partiit torsuusaanni pisartut amiilaarnartorujussuusut aammalu amerlasuutigut taakku pinngortartut Naleqqap ilaasortaatitai najuukkaangata:
- Allat uannit allaanerusumik isumaqarsinnaasarnerat ataqqisorujussuuvara. Aamma inissaqartitsisariaqarpugut sumiluunniit sukkulluunniit isummagut assigiinngisitaartut tunngavigalugit oqallissinnaanissatsinnut immitsinnut saassutinngikkaluarluta. Taamattorli isummanik avitseqatigiittarneq oqallittarnerlu inoqatinut isumaqatiginngisanut nikanarsaanermik innimiilliornermillu akoqartussaanngillat.
- Tassarpiaavorlu Naleqqap ilaasortaatitaasa ileqqulersuutaat. Oqaloqatiginnikkusunngillat, oqallikkusunngillat paarlattuanilli naveerserusupput inuillu imminnik allaanerusunik isummallit nilliaffigerusuppaat. Ataqqineqarusukkunik aamma namminneerlutik ilumoorussamik ataqqinninnermik takutitsisinnaasariaqarput, Ottosen oqarpoq.
Suliffik toqqissisimanartoq ujartorpaa
Bentiaraq Ottosen pisimasumut sunnerteqqasorujussuuvoq, allaat ima sunnertissimatigivoq kisimiilluni Inatsisartut ataatsimiinnerisa avataatigut partiit torsuusaanniikkusukkunnaarsimalluni:
- Suliartornissaq suliffimmillu paarsinissaq toqqissisimanartussaagaluarpoq, uangali uppernarsarsinnaavara partiit torsuusaanni pisartut ilungersunartorujussuusut, aamma taamatut saassutaritinnissamut aarlerinartorsiorneq annikinngilaq, taamaammat suliartornissaq nuanninngitsumillu pineqarnerup kinguneranik nuanniilliulernissaq uaneerannguamiittutut oqaatigineqartariaqarpoq, taamaammat Inatsisartuni inersuarmi ataatsimiinnerit avataanni unnukkut sapaatillu akunnerata naanerini najuunnissara kajumigiunnaarpara, taamaammat toqqissisimanarinngilara, Bentiaraq Ottosen (A) nassuiaavoq.
Inatsisartut siulittaasuat, Mimi Karlsen (IA) Sermitsiaq.AG-mit oqaaseqartinniarlugu suli sulissutigaarput.