Bentiaraq Ottosen Folketingimut qinigassanngortippoq
Folketingimut qinersisoqarnissaanut Atassutip qinigassanngortitaa siulleq partiip saqqiummiuteqammerpaa.
Atassutip inuusuttaa naalakkersuinikkut piffissami sivikitsumi qaffasissumik angusaqartoq, Bentiaraq Ottosen, siullermik kommunalbestyrelsimut 2017-imut qinigaasoq, kingornalu sinniisutut siorna Inatsisartunut ilaasortanngortoq, maanna Folketingimut qinersisoqarnissaanut qinigassanngortippoq.
Partiip siulersuisuunerinit kajumissaarneqaqattaarnermi kingorna, qinigassanngortinnissani aasarli eqqarsaatigilersimallugu taanna oqaluttuarpoq.
Naalagaaffeqatigiinneq nukittooq
Folketingimut qinersisoqarnissaanut sooq qinigassanngortippit?
- Uannut alloriaqqinnissaq uaniippoq, Folketingimut qinigassanngortinneq misilittaaaffigisariaqarlugu. Suli inuusukkama nutaanik misilittaanissamut periarfissanik matunik ammaaffigineqaqattaarpunga. Kisianni Atassut Folketingimi sinniiseqaleqqippat, naalagaaffeqatigiinnerup nukittuup sulissutigineqarnissaa pingaarnerpaavoq, politikeri 24-nik ukiulik taama oqaluttuarpoq.
Naalagaaffeqatigiinneq pingaaruteqartorujussuusoq aamma Nunatsinnut iluaqutaasoq, Bentiaraq Ottosenip erseqqissaatigaa. Ilulissani, Nuummi aamma Qaqortumi mittarfinnut aningaasaleeqataanera assersuutitut oqaatigaa.
- Naalagaaffeqatiinnerup iluani suleqatigiinnissamut periarfissanik amerlanerusunik Atassummit periarfissarsiorniarpugut, aningaasaqarnikkut aamma inuussutissarsiornikkut siuarsaanissaq eqqarsaatigalugu, taamaalilluta siunissami namminersulivissinnaassagatta, Bentiara Ottosen oqarpoq.
Namminersulivinnissamut aqqut
Namminersulivinnissamut aqqut aamma akisussaaffinnik naalagaaffimmit tigusinermi naalagaaffeqatigiinnermi suleqatigiissutigineqassasoq taassuma oqaatigaa.
Kingusinnerusukkut qineqqusaarutit ersarinnerusut partiimit saqqummiunneqarumaartut, Atassummi politikerip oqaatigaa.
Folketingimut qinersineq kingulleq sisamanngornermi juunip 18-anni 2015-imi pivoq. Folketingimut qinersinissap tullia taamaattumik kingusinnerpaamik juunip 17-anni 2019-imi pissaaq, kisiainni ministeriuneq qinersisoqarnissaanik qaqugukkulluunniit aalajangiisinnaavoq.
IA-meersoq Aaja Chemnitz Larsen Folketingimut qinigassanngorteqqinniarluni kisimi nalunaarutiginnereerpoq.