Bibi Chemnitz periarfissinneqarluarpoq

Nunat tamalaat saqqummersitseqatigiinnerat Nordic Fashion Biennale martsimi Frankfurtimi pilerpat Nunarput, Savalimmiut Islandilu immikkut samminneqassapput. Kalaaleq atisanik ilusilersuisartoq Bibi Chemnitz saqqummersitsinermi puisit teriannissallu amiinik atisalianik saqqummiussaqarniarpoq.

Nordic Fashion Biennale ukiormanna qulequtserneqarpoq ’The Weather Diaries’imik silap ullorsiutaanut nutserneqarsinnaasumik. Aappassaa Bibi Chemnitz Nordic Fashion Biennalemi Nunarput sinnerlugu saqqummersitsisussatut toqqarneqarpoq. Taassuma amminik akitsorterussivik Kopenhagen Fur suleqatigilerpaa teriannissat puisillu amiinik pissarsiffigisinnaalerlugu. Great Greenland aamma ikiuuppoq allattuut aataallu amiinik tunissuteqartoq.

- Kopenhagen Furip suleqatigilernera imaannaanngitsumik periarfissiivoq pikkorilluinnartunik sulisoqarmata. Ammit suliaralugillu misileraatigisinnaasakka kusanarluinnartuupput. Suleqatigiilersimanngitsuugutta taamaasiornissamut periarfissaqarsimassanngikkaluarpunga. Neriuppunga manna aamma aallarniutaasinnaasoq niuernikkut Kopenhagen Furip Great Greenlandillu suleqatigilernissaannut. Nalunngilara ammit alutornarsarlugit inuusuttunut naleqquttumik suliarisinnaallugit, Bibi Chemnitz oqarpoq.

Nordic Fashion Biennale Islandimi Nunat avannarliit illuannit aaqqissuunneqarpoq.

Saqqummersitsinissamut Bibi Chemnitzip piareersarneranit assit ataani takusinnaavatit