Biilinik ajutoorneq: Inuit marluk annaqqarsimapput
Ilulissani biili "aqunneqarsinnaajunnaarmat" inuit marluk annaqqarsimapput. Biilimik aquttup oqaatigisimavaa, biilip kigaallatsitsissutaa ajorsimasoq, politiit suliamik misissuisut oqaluttuarput.
Biili ataaseq ajutoorsimanerup kinguneranik pusissimasoq pillugu asseq facebookikkut maannakkorpiaq sammineqarpoq.
Kalaallit Nunaanni Politiit Sermitsiaq.AG-mut ilisimatitsissutigaat, ajutoorneq Ilulissani marlunngornerup ualiani pisimasoq.
- Biilimik aquttup oqaluttuarisimavaa qattunikkut ammut ingerlatilluni biilip kigaallatsitsissutaa ajorsimasoq, Bent Johnsen Ilulissat politiivini politikommissøriugallartoq oqarpoq.
Aquttup ilisimatitsissutigisimavaa, biili qulliup napasuanut aportillu unitseriarsimallugu. Biilili qaarsumut aporsimavoq taamalu pusilluni
Bent Johnsenip oqaatigaa, ajutoornermi imigassartortoqarsimanngitsoq, inunnillu ajoqusertoqarsimanngitsoq. Politiit biili sooq unissinnaasimannginnersoq paasiniarlugu misissuipput.
Aportingajavissimasut
Andreas Samuelsen aamma Andreas Møller qattunikkut qummukartillutik biili tungiminnut sukkasuupilussuarmik ingerlasoq takoriasaarsimavaat.
- Biili sukkasuupilussuulluni nueriasaarami, qujanartumillu ilaqutariit klapvognimik nassataqartut saneqqutiinnarlugit ingerlavoq toqqaannartumillu uagut tungitsinnut ingerlalluni. Biili sumut sangussanersoq nalugatsigu qanoq iliuusissaarukkaluarpugut.
Ikinngutigiit taakku marluullutik biili qulliup napasuanut aporialuni pusittoq takusimavaat.
- Pisiniarfik eqqoriarlugu arriitsumik pusikkiartorpoq, Andrea Samuelsen aquttumut ingerlaannartumik ikiuuteriarluni politiinut sianersimasoq oqaluttuarpoq.
- Tupannermut politiilluunniit oqarasuaataasa normuat puigoraluarpara, Andrea Samuelsen oqarpoq.
Taana ikinngutinilu Andreas Møller ajutoortoqarmat ajoqusersimanngillat.