Biilit igalaavi sermertitersimasut akiligassiissutigineqartut
Angut Nuummeersoq politiinit sisamanngormat akiligassinneqarpoq biilimi igalaavinik aputaajaalluarsimannginnini pillugu.
![Biilit igalaavi sermertitersimasut akiligassiissutigineqartut](https://image.sermitsiaq.ag/185025.webp?imageId=185025&width=960&height=518&format=jpg)
Eqqartuussiviup angut Nuummeersup aqqusinermi angallannermi inatsimmik unioqqutitsisimaneranik eqqartuussutaa Nunatta Eqqartuussiviata sisamanngornermi 10. februar ilalerpaa. Angut biilimi igalaavinik aputaajaalluarsimanngitsutut eqqartuunneqarpoq.
- Suliap tunuliaqutaa tassaavoq biilinik ingerlatsisup biilit igalaavi talerpia tungaaniittut aputaajarluarsimanngikkai, taamaasilluni aqqusinermi ingerlatsinermini talerpia tungimini isigisaqarsinnaasimanani, Kalaallit Nunaata Politiivi tusagassiorfinnut nalunaarummi ilisimatitsipput.
Erseqqarluttumik takusaqarsinnaaneq ulorianarsinnaavoq
Angut eqqartuussivimmi sassartinneqaqqaarami 1.500 koruuninik akiligassitsinneqarpoq, aqqusinermilu angallannermi pinerloqqissagaluaruni ukiuni pingasuni biilernermut allagartaminik annaasaqartussanngortinneqarluni. Taama aalajangerneq Nunatta Eqqartuussiviata isumaqatigivaa.
- Innuttaasut ilaasa biilit igalaavisa aputaajarluarsimannginnerat pillugu akiligassitsinneqarneq biilernermullu allagartap tulliani pinerloqqikkunik arsaarinnissutigineqarsinnaalertarnera assut tupaallaatigisarpaat. Biiliniilli silammut takusinnaasap killeqarnera aqqusinermi angallannermi ajutoortitserujussuarsinnaavoq, taamaammat pineqaatissiissutit taama sukangatigipput, unnerluussisussaatitaasoq Nina Jessen tusagassiorfinnut nalunaarummi oqarpoq.
Kalaallit Nunaata Politiivisa innuttaasut biilinik aqqusinermi angallassilinnginnerminni biilit igalaavisa aputaajarluarlugillu sermerunnaartinnissaannik kaammattuuteqarput, pingaartumik apingaatsiarsimatillugu issitsillugulu.