Billitsit akikitsut Siumumik avitsitsipput
Per Berthelsenip sermitsiaq.gl.-imut nassuiarpaa qineqqusaarutertik qanorpiaq paasisariaqarnersoq.
– Kukkuneruvoq Siumup neriorsuutigimmagu timmisartumut billetsit 200 kroniliinnarlugit pisiarineqarsinnaalissasut, aningaasaqarnermut naalakkersuisuugallartoq oqarpoq.
Qineqqusaaqataata Elisabeth Ravn Johansenip billetsit tupinnaannartumik akikitsut Nuuk TV-kkut Qanoruumilu tallimanngormat neriorsuutigai.
Taakkartorpai issiaviit inoqanngitsorpassuit Air Greenlandip timmisartuini siumorneqarsinnaasartut. Tamakku anaananut kisimiittunut, ilaquttaminnut tikeraarsinnaanngitsunut neqeroorutigineqartariaqartut oqaatigaa.
Neriorsuutilli Air Greenlandip pisortaanit ingerlaannaq nakkartinneqarput.
– Inissanik eqqartorneqartutut amerlatigisunik peqanngilagut, 200 kronillu amigarluinnarput mittarfinnut akitsuulluunniit 250 kr.-iusoq matussusissallugu, Michael Binzer oqarpoq.
Per Berthelsen, siunnersuummut isumassarsisuusimalluni sermitsiaq.gl.-imut oqarpoq.
– Spaniami ilaaniartut timmisartoq aallanngilaartoq takkussinnaapput, inissaqarpallu billitsit akikinaarujussuarlugit, 25 procentimik, pisiarisinnaasarpaat, taamalillutik angalaniartut timmisartuutillillu tamarmik naammagisimaarinnittarput. Nunatsinni soorunami mittarfinnut akitsuutit akileraarutillu ilanngunneqartussaapput, landskarsi amigartooruteqannginniassammat.
Elisabeth Ravn Johansenip aalajangiusimavaa Siumup qineqqusaarutaa atorsinnaasoq.
Air Greenland pigineqarpoq namminersornerusunit (37,5 procent), naalagaaffimmit (25 procent) SAS-imillu (37,5 procent), namminersornerusullu taamaalillutik siulersuisuni amerlanerussuteqaratik.
– Taavami namminersulerutta namminerisatsinnik timmisartuutileqatigiliuinnassaagut, Elisabeth Ravn Johansen sermitsiaq.gl-imut oqarpoq.
Siumup qineqqusaarutaa aviisini takoqqusaarutitut ilaavoq.