Binzer nipangersarneqarpoq
Air Greenlandip pisortaanerata Michael Binzerip sapaatip akunnerata siuliani kalaallit nunaanni mittarfeqarfiit atortuisa ajoquteqarnerat pillugu oqaaseqaataa siulersuisunit isumaqatigineqanngilaq.
Air Greenland novembarip 18-iani tusagassiorfinnut nalunaarummi oqaatigaa kalaallit nunaanni mittarfeqarfinni atortut ajoquteqarnerat taamaatitsiinnarnernut peqqutaasartut. Tamatuma kingorna suliffeqarfiup pisortaanera novembarip 19-iani radioaviisimut itisiliilluni oqaaseqaqquneqarpoq, tassanilu imatut issuarneqarpoq:
– Immaqa mittarfiit tallineqarnissaat nutaanillu mittarfiliortoqarnissaa oqaluuserilersinnagu mittarfeqarfinni atortut misissoqqaartiaraqaraluarput, Michael Binzer oqarpoq.
Taamatuma Air Greenlandip siulersuisui tusagassiorfinnut nalunaarutikkut allagaqartippai, Michael Binzerip oqaaseqaatai ajuusaarutigineqarlutik aammalu oqaaseqaatai oqallinnermut ajornannginaarinninnerusut, peqatigitillugulu saassusserpalaartumik nipilimmik kattutaarinninnerusoq nammineq tapersersunngikkitsik.
– Air Greenlandipmittarnermi qangattartarnermilu atortut siunissami aserfallatsaalineqarnissaat pillugit aaqqissuutissanik nassaarniarnermi oqaloqatigiinnerit pingaarutillit aallartinnerat qilanaaraat, tamannalu Air Greenlandip, Mittarfeqarfiit aammalu Attaveqarnermut Avatangiisinullu Naalakkersuisoqarfiup akornanni pivoq, siulersuisut tusagassiorfinnut nalunaarummi allapput.
Air Greenlandip siulersuisuisa peqatigitillugu tusagassiorfinnut nalunaarutikkut ajuusaarutigaat ilaasunut hunddredet arlalinnut taamaatitsiinnarnerit malitsigisaannik ajornartorsiutaasimasut, ilaasut sapinngisamik pitsaanerpaamik ikiarniarneqarsimallutillu ikiorniarneqarput. Taamaatitsiinnarnerit Air Greenlandimut millionerpassuarnik annaasaqaataasimapput, tamakkulu siunissami pinngitsoortinniarneqarsinnaapput, atortut maannakkornit pitsaanerusumik aaqqinneqarsinnaasuuppata.